¹ Аз же в первое лето кирово стах в державу и крепость. ² И ныне истину возвещу тебе се, еще трие царие востанут в персиде четвертый же разбогатеет богатством великим паче всех и по одержании богатства своего востанет на вся царства еллинская: ³ и востанет царь силен, и обладает властию многою, и сотворит по воли своей. ⁴ И егда станет царство его сокрушится и разделится на четыри ветры небесныя, и не в последняя своя, ниже по власти своей, еюже совладе, понеже исторгнется царство его и другим кроме сих отдастся. ⁵ И укрепится царь южский, и от князей их един укепеет нань и обладает властию многою над властию его. ⁶ И по летех его смесятся, и дщи царя южска внидет к северску царю, еже сотворити завет с ним, и не удержит крепости мышцы, и не станет племя ея, и предастся та и приведшии ю, и дева и укрепляяй ю во временех. ⁷ И востанет от цвета корене ея на уготование его и приидет в силу, и внидет во утверждения царя северскаго и сотворит в них и одержит: ⁸ и боги их со слиянными их, вся сосуды их вожделенны сребра и злата с пленники принесет во египет, и той востанет паче царя северска: ⁹ и внидет в царство царя южскаго, и возвратится на свою землю. ¹⁰ И сынове его соберут народ силен мног, и внидет грядый и потопляяй: и мимо прейдет и сядет, и даже до крепости его снидется. ¹¹ И разсвирепеет царь южский, и изыдет и брань сотворит с царем северским, и поставит народ мног, и предастся народ в руце его. ¹² И возмет народы, и возвысится сердце его, и соодолеет тмам, и не укрепеет. ¹³ И возвратится царь северский и приведет народ мног паче прежняго: и на конец времен лет приидет входом в силе велицей и со имением многим. ¹⁴ И в лета она мнози востанут на царя южска, и сынове губителей людий твоих воздвигнутся, еже поставити видение, и изнемогут. ¹⁵ И внидет царь северский и сотворит окоп и возмет грады тверды, мышцы же царя южскаго не станут и востанут избраннии его, и не будет крепости еже стати. ¹⁶ И сотворит входяй к нему по воли своей, и несть стоящаго противу лица его: и станет на земли савеи, и скончается в руце его. ¹⁷ И вчинит лице свое внити в силе всего царства своего, и праве вся сотворит с ним: и дщерь жен даст ему еже растлити ю, и не пребудет, и не будет ему. ¹⁸ И обратит лице свое на островы, и возмет многи, и погубит князи укоризны своея, обаче укоризна его возвратится ему. ¹⁹ И обратит лице свое в крепость земли своея, и изнеможет, и падется, и не обрящется. ²⁰ И востанет от корене его сад царства на уготование его производяй творяй славу царства: и в тыя дни еще сокрушится, и не в лицах, ни в рати: ²¹ станет во уготовании его ункчижися, и не даша нань славы царства: и приидет со обилием и соодолеет царству лестьми, ²² и мышцы потопляющаго потопятся от лица его и сокрушатся и старейшина завета. ²³ И от совокуплений к нему сотворит лесть, и взыдет, и преодолеет их в мале языце: ²⁴ и во обилие и в тучныя страны приидет, и сотворит, яже не сотвориша отцы его и отцы отцев его: пленение и корысти и имение им расточит, и на египта помыслит мыслию даже до времене. ²⁵ И востанет крепость его, и сердце его на царя южскаго в силе велице, царь же южский сотворит с ним сечь силою великою и крепкою зело, и не станут: яко помышляют нань помышления ²⁶ и изядят потребная его и сокрушат его, и силы разсыплет, и падут язвении мнози. ²⁷ И оба царя, сердца их на лукавство, и на трапезе единей возглаголют лжу, и не предуспеет, яко еще конец на время. ²⁸ И возвратится на свою землю со имением многим, и сердце его на завет святый, и сотворит, и возвратится на свою землю. ²⁹ На время возвратится и приидет на юг, и не будет якоже первая и последняя. ³⁰ И внидут с ним исходящии китяне, и смирится, и возвратится, и возярится на завет святый: и сотворит, и возвратится, и умыслит на оставльшыя завет святый. ³¹ И мышцы и племена от него востанут и осквернят святыню могутства и преставят жертву всегдашнюю и дадят мерзость запустения, ³² и беззаконнующии завет наведут со прелестию: людие же ведуще Бога своего премогут и сотворят, ³³ и смысленнии людие уразумеют много, и изнемогут в мечи и в пламени, и в пленении и в разграблении дний. ³⁴ И егда изнемогут, поможется им помощию малою, и приложатся к ним мнози со прелестию. ³⁵ И от смысливших изнемогут, еже разжещи я и избрати, и еже открыти даже до конца времене, яко еще на время. ³⁶ И сотворит по воли своей, и царь возвысится и возвеличится над всяким богом, и на Бога богов возглаголет тяжкая, и управит, дондеже скончает гнев, в скончание бо бывает. ³⁷ И о всех бозех отцев своих не смыслит, и рачении жен, и о всяцем бозе не уразумеет, понеже паче всех возвеличится. ³⁸ И бога маозима на месте своем прославит, и бога, егоже не ведеша отцы его, почтит сребром и златом и камыком честным и похотьми, ³⁹ и сотворит тверделем убежищ с богом чуждим, егоже познает, и умножит славу, и покорит им многи, и землю разделит в дары. ⁴⁰ И на конец времене сразится ратию с царем южским: и соберется на него царь северский с колесницами и с конники и с корабли многими, и внидет в землю, и сокрушит, и мимоидет, ⁴¹ и внидет на землю саваимску, и мнози изнемогут: сии же спасутся от руки его, едом и моав и начало сынов аммоних. ⁴² И прострет руку свою на землю, и земля египетска не будет во спасение. ⁴³ И владети начнет в сокровенных злата и сребра и во всех вожделенных египта и ливиев и ефиопов, в тверделех их. ⁴⁴ И слышания и поткщания возмутят его от восток и от севера: и приидет во ярости мнозе, еже погубити многи. ⁴⁵ И поткнет кущу свою ефадано между морями, на горе святей савеи, приидет даже до части ея, и несть избавляяй его.