¹ В первое лето дариа сына ассуирова, от племене мидска, иже царствова во царстве халдейстем, ² в лето первое царства его, аз даниил разумех в книгах число лет, о немже бысть слово Господне ко иеремии пророку, на скончание опустения Иерусалимля седмьдесят лет. ³ И дах лице мое к Господу Богу, еже взыскати молитвы и прошения в посте и во вретищи и пепеле, ⁴ и молихся ко Господу Богу моему и исповедахся и рех: Господи, Боже великий и чудный, храняй завет твой и милость твою любящым тя и хранящым заповеди твоя: ⁵ согрешихом, беззаконновахом, нечествовахом и отступихом и уклонихомся от заповедий твоих и от судов твоих ⁶ и не послушахом раб твоих пророков, иже глаголаша во имя твое ко царем нашым и князем нашым, и отцем нашым и всем людем земли. ⁷ Тебе, Господи, правда, нам же стыдение лица, якоже день сей, мужу иудину, и живущым во Иерусалиме, и всему израилю, и ближним и дальним во всей земли, идеже разсеял еси я тамо, во отвержении их, имже отвергошася тебе, Господи. ⁸ Тебе, Господи, есть правда, нам же стыдение лица, и царем нашым и князем нашым и отцем нашым, иже согрешихом тебе. ⁹ Господу же Богу нашему щедроты и очищения, яко отступихом от Господа ¹⁰ и не послушахом гласа Господа Бога нашего, ходити в законех его, ихже даде пред лицем нашим рукою раб своих пророков. ¹¹ И весь израиль преступи закон твой, и уклонишася еже не послушати гласа твоего: и прииде на ны клятва и заклятие вписаное в законе моисеа раба Божия, яко согрешихом ему. ¹² И устави словеса своя, яже глагола на ны и на судии нашя, иже судиша нам, навести на ны злая великая, яковых не бысть под всем небесем, по (всем) бывшым во Иерусалиме, ¹³ якоже есть писано в законе моисеове, вся злая сия приидоша на ны: и не помолихомся лицу Господа Бога нашего, отвратитися от неправд наших, и еже смыслити во всей истине твоей (Господи). ¹⁴ И убудися Господь Бог на злобу нашу и наведе сия на ны, яко праведен Господь Бог наш во всем деянии своем, еже сотвори, и не послушахом гласа его. ¹⁵ И ныне, Господи, Боже наш, иже извел еси люди твоя от земли египетския рукою крепкою и сотворил еси себе самому имя, якоже день сей, согрешихом, беззаконновахом. ¹⁶ Господи, всем помилованием твоим да отвратится ярость твоя и гнев твой от града твоего Иерусалима, от горы святыя твоея: яко согрешихом неправдами нашими и беззаконием отец наших, Иерусалим и людие твои во укоризну быша во всех окрестных нас. ¹⁷ И ныне, Господи, Боже наш, услыши молитву раба твоего и прошение его, и яви лице твое на святилище твое опустевшее, тебе ради, Господи. ¹⁸ Приклони, Господи, Боже мой, ухо твое и услыши, отверзи очи твои и виждь потребление наше и града твоего, в немже призвася имя твое, яко не на нашя правды (уповающе) повергаем моление наше пред тобою, но на щедроты твоя многия, Господи. ¹⁹ Услыши, Господи, очести, Господи, вонми, Господи, и сотвори, и не закосни тебе ради, Боже мой, яко имя твое призвася во граде твоем и в людех твоих. ²⁰ Еще же ми глаголющу и молящуся и исповедающу грехи моя и грехи людий моих израиля, и припадающу с молением моим пред Господем Богом моим о горе святей его: ²¹ и еще глаголющу ми в молитве, и се, муж гавриил, егоже видех в видении моем в начале, парящь, и прикоснуся мне, аки в час жертвы вечерния, ²² и вразуми мя, и глагола ко мне, и рече: данииле, ныне изыдох устроити тебе разум: ²³ в начале молитвы твоея изыде слово, и аз приидох возвестити тебе, яко муж желаний еси ты, размысли о словеси и разумей во явлении. ²⁴ Седмьдесят седмин сократишася о людех твоих и о граде твоем святем, яко да обетшает согрешение, и скончается грех, и запечатаются греси, и загладятся неправды, и очистятся беззакония, и приведется правда вечная: и запечатается видение и пророк, и помажется святый святых. ²⁵ И увеси и уразумееши от исхода словесе, еже отвещати и еже соградити Иерусалим, даже до Христа старейшины седмин седмь и седмин шестьдесят две: и возвратится, и соградится стогна и забрала, и истощатся лета. ²⁶ И по седминах шестидесяти двух потребится помазание, и суд не будет в нем: град же и святое разсыплется со старейшиною грядущим, и потребятся аки в потопе, и до конца рати сокращенныя чином, погибельми. ²⁷ И утвердит завет мнозем седмина едина: в пол же седмины отимется жертва и возлияние, и во святилищи мерзость запустения будет, и даже до скончания времене скончание дастся на опустение.