¹ В первое лето валтасара царя халдейска, даниил сон виде и видения главы его на ложи его, и сон свой вписа: ² аз даниил видех в видении моем нощию: и се, четыри ветри небеснии налегоша на море великое, ³ и четыри зверие велицыи исхождаху из моря, различни между собою: ⁴ первый аки львица имый криле, криле же его аки орли, зрях, дондеже исторжена быша крила его, и воздвижеся от земли, и на ногу человечу ста, и сердце человечо дадеся ему: ⁵ и се, зверь вторый подобен медведице, и на стране единей ста, и три ребра во устех его, среде зубов его, и сице глаголаху ему: востани, яждь плоти многи: ⁶ созади сего видех: и се, зверь ин аки рысь, томуже крила четыри птичия над ним и четыри главы зверю, и власть дадеся ему: ⁷ созади сего видех: и се, зверь четвертый страшен и ужасен и крепок излиха, зубы же его железни велии, ядый и истончевая, останки же ногама своима попираше, тойже различаяся излиха паче всех зверей прежних, и рогов десять ему: ⁸ разсмотрях в розех его, и се, рог другий мал взыде среде их, и трие рози преднии его исторгнушася от лица его, и се, очи аки очи человечи в розе том, и уста глаголюща великая. ⁹ зрях дондеже престоли поставшася, и ветхий денми седе, и одежда его бела аки снег, и власи главы его аки волна чиста, престол его пламень огнен, колеса его огнь палящь: ¹⁰ река огненна течаше исходящи пред ним: тысящя тысящ служаху ему, и тмы тем предстояху ему: судище седе, и книги отверзошася. ¹¹ Видех тогда от гласа словес великих, яже рог оный глаголаше, дондеже убися зверь и погибе, и тело его дадеся во сожжение огненно: ¹² и прочих зверей преставися власть, и продолжение жития дадеся им до времене и времене. ¹³ Видех во сне нощию, и се, на облацех небесных яко Сын Человечь идый бяше и даже до ветхаго денми дойде и пред него приведеся: ¹⁴ и тому дадеся власть и честь и Царство, и вси людие, племена и языцы тому поработают: власть его власть вечная, яже не прейдет, и Царство его не разсыплется. ¹⁵ Вострепета дух мой в состоянии моем, аз даниил, и видения главы моея смущаху мя. ¹⁶ И приидох ко единому от стоящих и известия просих от него научитися о всех сих. И поведа ми известие и сказание словес возвести ми: ¹⁷ сии зверие велицыи четыри, четыри царства востанут на земли, ¹⁸ яже возмутся: и преймут царство святии вышняго и содержати будут оное даже до века веков. ¹⁹ И вопрошах испытно о звери четвертем, яко бяше различен паче всякаго зверя, страшен вельми, зубы его железни и ногти его медяни, ядый и истончевая, останки же ногама своима попираше: ²⁰ и о десяти розех его иже на главе его, и о друзем возшедшем и истрясшем первыя три, рог же той емуже очи и уста глаголюща великая, и вид‹ние его более прочиих: ²¹ зрях, и рог той творяше рать со святыми и укрепися на них, ²² дондеже прииде ветхий денми и суд даде святым вышняго: и время приспе, и царство прияша святии. ²³ И рече: зверь четвертый царство четвертое будет на земли, еже превзыдет вся царства и пояст всю зеемлю, и поперет ю и посечет: ²⁴ и десять рогов его десять царей востанут, и по них востанет другий, иже превзыдет злобами всех прежних и три цари смирит, ²⁵ и словеса на вышняго возглаголет и святых вышняго смирит, и помыслит пременити времена и закон, и дастся в руку его даже до времене и времен и полувремене: ²⁶ и судище сядет, и власть его преставят еже потребити и погубити до конца: ²⁷ царство же и власть и величество царей, иже под всем небесем, дастся святым вышняго: и Царство его Царство вечное, и вся власти тому работати будут и слушати. ²⁸ До зде скончание словесе. Аз даниил, надолзе размышления моя смущаху мя, и зрак мой пременися на мне, и глагол в сердцы моем соблюдох.