¹ И бысть угодно пред царем, и постави во царстве князей сто и двадесять, еже быти им во всем царстве его, ² над ними же три чиновники, от нихже бе даниил един, дабы отдавали им князи слово, яко да царю не стужают. ³ И бе даниил над ними, яко дух бяше преизюбилен в нем, и царь постави его над всем царством своим. ⁴ Чиновницы же и князи искаху вины обрести на даниила: и всякия вины и соблазна и греха не обретоша на него, яко верен бяше. ⁵ И реща чиновницы не обрящем на даниила вины, аще не в законех Бога его. ⁶ Тогда чиновницы и князи предсташа царю и реша ему: дарие царю, во веки живи: ⁷ совещаша вси иже во царстве твоем воеводы и князи, ипати и обладающии странами, еже уставити устав царский и укрепити предел, яко аще кто попросит прошения от всякаго бога и человека до дний тридесяти, разве точию от тебе, царю, да ввержен будет в ров левский: ⁸ ныне убо, царю, устави предел и положи писание, яко да не изменится заповедь мидска и персска, (да никтоже преступит ея). ⁹ Тогда царь дарий повеле вписати заповедь. ¹⁰ Даниил же егда уведе, яко заповедь вчинися, вниде в дом свой: дверцы же отверсты ему в горнице его противу Иерусалима, в три же времена дне бяше прекланяя колена своя, моляся и исповедаяся пред Богом своим, якоже бе творя прежде. ¹¹ Тогда мужие онии наблюдоша и обретоша даниила просяща и молящася Богу своему, ¹² и пришедше реша пред царем: царю, не вчинил ли еси ты предела, яко да всяк человек, иже аще попросит у всякаго бога и человека прошения до тридесяти дний, но точию у тебе, царю, да ввержется в ров левск? И рече царь: истинно слово, и заповедь мидска и персска не мимоидет. ¹³ Тогда отвещаша пред царем и глаголаша: даниил, иже от сынов плена иудейска, не покорися заповеди твоей (и не раде) о пределе, егоже вчинил еси: в три бо времена дне просит у Бога своего прошений своих. ¹⁴ Тогда царь, яко слышав слово сие, зело опечалися о нем, и о данииле пряшеся еже избавити его, и бе даже до вечера пряся еже избавити его. ¹⁵ Тогда мужие онии глаголаша царю: веждь, царю яко мидом и персом не леть есть пременити всякаго предела и устава, егоже царь уставит. ¹⁶ Тогда царь рече, и приведоша даниила и ввергоша его в ров левск. И рече царь даниилу: Бог твой, емуже ты служиши присно, той избавит тя. ¹⁷ И принесоша камень един и возложиша на устие рва, и запечата царь перстнем своим и перстнем вельмож своих, да не изменится деяние о данииле. ¹⁸ И отиде царь в дом свой и ляже без вечери, и яди не внесоша к нему: и сон отступи от него. И заключи Бог уста львом, и не стужиша даниилу. ¹⁹ Тогда царь воста заутра на свете и со тщанием прииде ко рву левску. ²⁰ И егда приближися ко рву, возопи гласом крепким: данииле, рабе Бога живаго! Бог твой, емуже ты служиши присно, возможе ли избавити тя из уст львовых? ²¹ И рече даниил цареви: царю, во веки живи: ²² Бог мой посла ангела своего и затвори уста львов, и не вредиша мене, яко обретеся пред ним правда моя, и пред тобою, царю, согрешения не сотворих. ²³ Тогда царь вельми возвеселися о нем и рече даниила извести из рва. И изведен бысть даниил из рва, и всякаго тления не обретеся на нем яко верова в Бога своего. ²⁴ И рече царь, и приведоша мужы оклеветавшыя даниила и в ров левск ввергоша я и сыны их и жены их: и не доидоша дна рва, даже соодолеша им львы и вся кости их истончиша. ²⁵ Тогда дарий царь написа всем людем, племеном, языком, живущым во всей земли: мир вам да умножится: ²⁶ от лица моего заповедася заповедь сия во всей земли царства моего, да будут трепещуще и боящеся от лица Бога даниилова, яко той есть Бог живый и пребываяй во веки, и Царство его не разсыплется, и власть его до конца: ²⁷ подемлет и избавляет, и творит знамения и чудеса на небеси и на земли, иже избави даниила от уст львовых. ²⁸ Даниил же управляше во царстве дариеве и во царстве кира персянина.