¹ В лето осмонадесятое навуходоносор царь сотвори тело злато, высота его лактий шестидесяти и широта его лактий шести, и постави е на поли деире во стране вавилонстей. ² И посла (навуходоносор царь) собрати ипаты и воеводы и местоначалники, вожди же и мучители, и сущыя на властех и вся князи стран, приити на обновление кумира, егоже постави навуходоносор царь. ³ И собрашася местоначалницы, ипатове, воеводы, вождеве, мучителие велицыи, иже над властьми, и вси началницы стран на обновление тела, еже постави навуходоносор царь: и сташа пред телом, еже постави навуходоносор царь. ⁴ И проповедник вопияше со крепостию: вам глаголется, народи, людие, племена, языцы: ⁵ в оньже час аще услышите глас трубы, свирели же и гусли, самвики же и псалтири и согласия, и всякаго рода мусикийска, падающе покланяйтеся телу златому, еже постави навуходонсор царь: ⁶ и иже аще не пад поклонится, в той час ввержен будет в пещь огнем горящую. ⁷ И бысть егда услышаша людие глас трубы, свирели же и гусли, самвики же и псалтири и согласия, и всякаго рода мусикийска, падающе вси людие, племена, языцы, покланяхуся телу златому, еже постави навуходоносор царь. ⁸ Тогда приступиша мужие халдейстии и оболгаша иудеев, ⁹ отвещавше реша навуходоносору цареви: царю, во веки живи: ¹⁰ ты, царю, положил еси повеление, да всяк человек, иже аще услышит глас трубы, свирели же и гусли, самвики же и псалтири и согласия, и всякаго рода мусикийска, ¹¹ и не пад поклонится телу златому, ввержен будет в пещь огнем горящую. ¹² Суть убо мужие иудее, ихже поставил еси над делы страны вавилионския, седрах, мисах и авденаго, иже не послушаша заповеди твоея, царю, и богом твоим не служат и телу златому, еже поставил еси, не покланяются. ¹³ Тогда навуходоносор в ярости и гневе рече привести седраха, мисаха и авденаго. И приведени быша пред царя. ¹⁴ И отвеща навуходоносор и рече им: аще воистинну, седрах, мисах и авденаго, богом моим не служите и телу златому, еже поставих, не покланяетеся? ¹⁵ ныне убо аще есте готови, да егда услышите глас трубы, свирели же и гусли, самвики же и псалтири и согласия, и всякаго рода мусикийска, падше поклонитеся телу златому, еже сотворих: аще же не поклонитеся, в той час ввержени будете в пещь огнем горящую: и кто есть Бог, иже измет вы из руки моея? ¹⁶ И отвещаша седрах, мисах и авденаго, глаголюще царю навуходоносору: не требе нам о глаголе сем отвещати тебе: ¹⁷ есть бо Бог наш на небесех, емуже мы служим, силен изяти нас от пещи огнем горящия и от руку твоею избавити нас, царю: ¹⁸ аще ли ни, ведомо да будет тебе, царю, яко богом твоим не служим и телу златому, еже поставил еси, не кланяемся. ¹⁹ Тогда навуходоносор исполнися ярости, и зрак лица его изменися на седраха, мисаха и авденаго, и рече: разжжите пещь седмерицею, дондеже до конца разгорится. ²⁰ И мужем сильным крепостию рече: оковавше седраха, мисаха и авденаго, вверзите в пещь огнем горящую. ²¹ Тогда мужие онии оковани быша с гащами своими и покрывалы, и сапогми и со одеждами своими, и ввержени быша посреде пещи огнем горящия. ²² Понеже глагол царев превозможе, и пещь разжжена бысть преизлишше: и мужей оных, иже ввергоша седраха, мисаха и авденаго, уби пламень огненный. ²³ И мужие тии трие, седрах, мисах и авденаго, падоша посреде пещи огнем горящия оковани, ²⁴ и хождаху посреде пламене поюще Бога и благословяще Господа. ²⁵ И став с ними азариа помолися сице и отверз уста своя посреде огня рече: ²⁶ благословен еси, Господи, Боже отец наших, хвально и прославлено имя твое во веки, ²⁷ яко праведен еси о всех, яже сотворил еси нам, и вся дела твоя истинна, и прави путие твои, и вси суди твои истинни: ²⁸ и судбы истинны сотворил еси по всем, яже навел еси на ны и на град святый отец наших Иерусалим: яко истиною и судом навел еси сия вся на ны грех ради наших. ²⁹ Яко согрешихом и беззаконновахом отступивше от тебе, и прегрешихом во всех, ³⁰ и заповедий твоих не послушахом, ниже соблюдохом, ниже сотворихом, якоже заповедал еси нам, да благо нам будет. ³¹ И вся, елика сотворил еси нам, и вся, елика навел еси на ны, истинным судом сотворил еси, ³² и предал еси нас в руки врагов беззаконных, мерзких отступников, и царю неправедну и лукавнейшу паче всея земли. ³³ И ныне несть нам отверзти уст: студ и поношение быхом рабом твоим и чтущым тя. ³⁴ Не предаждь убо нас до конца имене твоего ради, и не разори завета твоего, ³⁵ и не отстави милости твоея от, нас, авраама ради возлюбленнаго от тебе, и за исаака раба твоего и израиля святаго твоего, ³⁶ имже глаголал еси умножити семя их, яко звезды небесныя и яко песок вскрай моря. ³⁷ Яко, Владыко, умалихомся паче всех язык, и есмы смирени по всей земли днесь грех ради наших, ³⁸ и несть во время сие князя и пророка и вожда, ниже всесожжения, ниже жертвы, ниже приношения, ниже кадила ни места, еже пожрети пред тобою ³⁹ и обрести милость: но душею сокрушенною и духом смиренным да прияти будем. ⁴⁰ Яко во всесожжениих овних и юнчих и яко во тмах агнец тучных, тако да будет жертва наша пред тобою днесь, и да совершится по тебе, яко несть студа уповающым на тя. ⁴¹ И ныне возследуем всем сердцем и боимся тебе и ищем лица твоего: ⁴² не посрами нас, но сотвори с нами по кротости твоей и по множеству милости твоея, ⁴³ и изми нас по чудесем твоим, и даждь славу имени твоему, Господи. ⁴⁴ И да посрамятся вси являющии рабом твоим злая, и да постыдятся от всякия силы, и крепость их да сокрушится, ⁴⁵ и да разумеют, яко ты еси Господь Бог един и славен по всей вселенней. ⁴⁶ И не престаша ввергшии их слуги царевы, жгуще пещь наффою и смолою, и изгребьими и хврастием: ⁴⁷ и разливащеся пламень над пещию на лактий четыредесять девять, ⁴⁸ и обыде и пожже, ихже обрете окрест пещи халдейския. ⁴⁹ Ангел же Господень сниде купно с сущими со азариею в пещь ⁵⁰ и оттрясе пламень огненный от пещи и сотвори среднее пещи яко дух росы шумящь: и не прикоснуся их отнюд огнь и не оскорби, ниже стужи им. ⁵¹ Тогда тии трие яко едиными усты пояху и благословляху и славляху Бога в пещи, глаголюще: ⁵² благословен еси, Господи, Боже отец наших, и препетый и превозносимый во веки, и благословено имя славы твоея святое, и препетое и превозносимое во веки. ⁵³ Благословен еси во храме святыя славы твоея, и препетый и превозносимый во веки. ⁵⁴ Благословен еси, видяй бездны, седяй на херувимех, и препетый и првозносимый во веки. ⁵⁵ Благословен еси на престоле славы Царствия твоего, и препетый и превозносимый во веки. ⁵⁶ Благословен еси на тверди небесней, и препетый и превозносимый во веки. ⁵⁷ Благословите, вся дела Господня, Господа, пойте и превозносите его во веки. ⁵⁸ Благословите, ангели Господни, Господа, пойте и превозносите его во веки. ⁵⁹ Благословите, небеса, Господа, пойте и превозносите его во веки. ⁶⁰ Благословите, воды вся, яже превыше иебес, Господа, пойте и превозносите его во веки. ⁶¹ Благословите, вся силы Господни, Господа, пойте и превозносите его во веки. ⁶² Благословите, солнце и луна, Господа, пойте и превозносите его во веки. ⁶³ Благословите, звезды небесныя, Господа, пойте и превозносите его во веки. ⁶⁴ Благословите, всяк дождь и роса, Господа, пойте и превозносите его во веки. ⁶⁵ Благословите, вси дуси, Господа, пойте и превозносите его во веки. ⁶⁶ Благословите, огнь и вар, Господа, пойте и превозносите его во веки. ⁶⁷ Благословите, студь и зной, Господа, пойте и превозносите его во веки. ⁶⁸ Благословите, росы и иней, Господа, пойте и превозносите его во веки. ⁶⁹ Благословите, нощи и дние, Господа, пойте и превозносите его во веки. ⁷⁰ Благословите, свет и тма, Господа, пойте и превозносите его во веки. ⁷¹ Благословите, лед и мраз, Господа, пойте и превозносите его во веки. ⁷² Благословите, сланы и снези, Господа, пойте и превозносите его во веки. ⁷³ Благословите, молния и облацы, Господа, пойте и превозносите его во веки. ⁷⁴ Да благословит земля Господа, да поет и превозносит его во веки. ⁷⁵ Благословите, горы и холми, Господа, пойте и превозносите его во веки. ⁷⁶ Благословите, вся прозябающая на земли, Господа, пойте и превозносите его во веки. ⁷⁷ Благословите, источницы, Господа, пойте и превозносите его во веки. ⁷⁸ Благословите, моря и реки, Господа, пойте и превозносите его во веки. ⁷⁹ Благословите, кити и вся движущаяся в водах, Господа, пойте и превозносите его во веки. ⁸⁰ Благословите, вся птицы небесныя, Господа, пойте и превозносите его во веки. ⁸¹ Благословите, зверие и вси скоти, Господа, пойте и превозносите его во веки. ⁸² Благословите, сынове человечестии, Господа, пойте и превозиосите его во веки. ⁸³ Да благословит израиль Господа, пойте и превозносите его во веки. ⁸⁴ Благословите, иерее Господни, Господа, пойте и превозносите его во веки. ⁸⁵ Благословите, раби Господни, Господа, пойте и превозносите его во веки. ⁸⁶ Благословите, дуси и души праведных, Господа, пойте и превозносите его во веки. ⁸⁷ Благословите, преподобнии и смиреннии сердцем, Господа, пойте и превозносите его во веки. ⁸⁸ Благословите, ананиа, азариа и мисаил, Господа, пойте и превозносите его во веки: яко изят ны от ада и спасе ны от руки смерти, и избави ны от среды пещи и горяща пламене, и от среды огня избави ны. ⁸⁹ Исповедайтеся Господеви, яко благ, яко в век милость его. ⁹⁰ Благословите, вси чтущии Господа, Бога богов, пойте и исповедайтеся, яко во век милость его. ⁹¹ Навуходоносор же слыша поющих их, и почудися, и воста со тщанием, и рече вельможам своим: не триех ли мужей ввергохом среде огня связаных? И реша цареви: воистинну, царю. ⁹² И рече царь: се, аз вижду мужы четыри разрешены и ходящя среде огня, и истления несть в них, и зрак четвертаго подобен Сыну Божию. ⁹³ Тогда прииде навуходоносор ко устию пещи огнем разжженныя и рече: седрах, мисах, авденаго, раби Бога вышняго, изыдите и приидите. И изыдоша седрах, мисах, авденаго от среды огня. ⁹⁴ И собрашася князи и воеводы, и местоначалницы и вельможи царевы, и видяху мужей, яко не одоле огнь телесем их и власа главы их не опали, и ризы их не изменишася, и вони огненны не бяше в них. ⁹⁵ И поклонися пред ними царь Богу, и отвеща навуходоносор царь и рече: благословен Бог седрахов, мисахов и авденаго, иже посла ангела своего и изя отроки своя, яко уповаша на него: и слово царево премениша, и предаша телеса своя во огнь, яко да не послужат, ни поклонятся всякому богу иному, но точию Богу своему: ⁹⁶ и аз заповедаю заповедь: вси людие, племя, язык, аще речет хулу на Бога седрахова и мисахова и авденаго, в пагубу будут, и домове их в разграбление: понеже несть Бога другаго, иже возможет избавити сице. ⁹⁷ Тогда царь постави седраха, мисаха и авденаго во стране вавилонстей, и возвеличи их, и сподоби их старейшинства иудеев всех сущих во царстве его. ⁹⁸ Навуходоносор царь всем людем, племеном и языком сущым во всей земли, мир вам да умножится. ⁹⁹ Знамения и чудеса, яже сотвори со мною Бог вышний, угодно бысть предо мною возвестити вам, ¹⁰⁰ коль великая и крепкая: Царство его Царство вечное, и власть его в роды и роды.