¹ В лето второе царства навуходоносорова, соние виде навуходоносор, и ужасеся дух его, и сон его отступи от него: ² и рече царь призвати обаятелей и волхвов, и чародеев и халдеев, еже возвестити царю сон его. И приидоша и сташа пред царем. ³ И рече им царь: видех сон, и ужасеся дух мой, еже уразумети сон. ⁴ И глаголаше халдее сирски цареви: царю, во веки живи: ты повеждь сон рабом твоим, и сказание его возвестим ти. ⁵ Отвеща же царь халдеом и рече: слово отступило есть от мене: аще убо не возвестите ми сна и сказания его, в пагубу вудете, и домове ваши разграбятся: ⁶ аще же сон и сказание его возвестите мне, даяния и дары и честь многу приимете от мене: точию сон и сказание его возвестите мне. ⁷ И отвещаша второе и реша: царь да повесть сон рабом своим, и сказание его возвестим ему. ⁸ И отвеща царь и рече: поистинне вем аз, яко время вы (точию) искупуете, понеже видите, яко отступило есть слово от мене: ⁹ аще убо сна не возвестите мне, вем, яко слово ложно и растленно совещастеся рещи предо мною, дондеже время минет: сон мой поведите мне, и увем, яко и сказание его возвестите мне. ¹⁰ Отвещаша же паки халдее пред царем и реша: несть человека на земли, иже слово царево возможет возвестити, яко всяк царь великий и князь не вопрошает ссиеваго словесе обаятеля, волхва и халдеа: ¹¹ понеже слово, егоже вопрошает царь, тяжко, и несть другаго, иже возвестит е пред царем, но точию бози, ихже несть житие со всякою плотию. ¹² Тогда царь в ярости и во гневе мнозе рече погубити вся мудрыя ваввилонския. ¹³ И изыде повеление, и мудрии убивахуся: и взыскаша даниила и другов его убити я. ¹⁴ Тогда даниил отвеща совет и разум ариоху архимагиру царску, иже изыде убити мудрых вавилонских, ¹⁵ и вопрошаше и глаголя: княже царев, о чесом изыде изречение безстудное от лица царева? Возвести же ариох слово даниилу. ¹⁶ Даниил же вниде и моли царя, яко да время даст ему, и сказание его возвестит царю. ¹⁷ И вниде даниил в дом свой и возвести слово анании и азарии и мисаилу, другом своим: ¹⁸ и щедрот прошаху у Бога небеснаго отайне сей, яко да не погибнут даниил и друзие его со прочиими мудрыми вавилонскими. ¹⁹ Тогда даниилу во сне нощию тайна открыся: и благослови даниил Бога небеснаго ²⁰ и рече: буди имя Господа Бога благословено от века и до века, яко премудрость и смысл и крепость его есть, ²¹ и той пременяет времена и лета, поставляет цари и преставляет, даяй премудрость мудрым и разум ведущым смышление: ²² той открывает глубокая и сокровенная, сведый сущая во тме и свет с ним есть: ²³ тебе, Боже отцев моих, исповедаюся и хвалю, яко премудрость и силу дал ми еси и возвестил ми еси, яже просихом у тебе, и видение царево возвестил ми еси. ²⁴ И прииде даниил ко ариоху егоже пристави царь погубити мудрыя вавилонския, и рече ему: мудрых вавилонских не погубляй, но введи мя пред царя, и сказание сна возвешу ему. ²⁵ Тогда ариох с потщанием введе даниила пред царя и рече ему: обретох мужа от пленник жидовских, иже сказание царю возвестит. ²⁶ И отвеща царь и рече даниилу, емуже имя валтасар: можеши ли ми возвестити сон, егоже видех, и сказание его? ²⁷ И отвеща даниил пред царем и рече: тайны, еяже царь вопрошает, несть мудрых, волхвов, ниже обаятелей газаринов (сила) возвестити царю: ²⁸ но есть Бог на небеси открываяй тайны и возвести царю навуходоносору, имже подобает быти в последния дни. Сон твой и видение главы твоея на ложи твоем сие есть, царю: ²⁹ помышления твоя на ложи твоем взыдоша, чесому подобает быти по сих, и открываяй тайны яви тебе, имже подобает быти: ³⁰ и мне не премудростию сущею во мне паче всех живущих тайна сия открыся, но ради того, яко да возвещу сказание царю, да уразумееши размышления сердца твоего. ³¹ Ты, царю видел еси: и се, тело едино, велие тело оно, и обличие его высоко, стоящо пред лицем твоим, и образ его страшен: ³² тело, егоже глава от злата чиста, руце и перси и мышцы его сребряны, чрево и стегна медяна, ³³ голени железны, нозе, часть убо некая железна и часть некая скудельна: ³⁴ видел еси, дондеже отторжеся камень от горы без рук, и удари тело в нозе железны и скудельны, и истни их до конца: ³⁵ тогда сотрошася вкупе скудель, железо, медь, сребро и злато, и бысть яко прах от гумна летня: и взят я премногий ветр, и место не обретеся им: камень же поразивый тело бысть гора велика и наполни всю землю. ³⁶ Сей есть сон, а сказание его речем пред царем. ³⁷ Ты, царю, царь царей, емуже Бог небесный царство даде крепко и державно и честно: ³⁸ во всяцем месте, идеже живут сынове человечи и зверие польстии, и птицы небесныя и рыбы морския дал есть в руку твою и поставил тя властелина всем: ты еси глава златая. ³⁹ И последи тебе востанет царство другое меншее тебе, еже есть сребро, царство же третие, еже есть медь, еже соодолеет всей земли, ⁴⁰ и царство четвертое, еже будет крепко аки железо: якоже железо стончевает и умягчает вся, такожде и то истончит и истнит вся. ⁴¹ А яко видел еси нозе и персты, часть убо некую железну, часть же некую глиняну, царство разделено будет, и от корене железна будет в нем, якоже видел еси железо смешено с глиною: ⁴² и персты ножнии, часть убо некая железна, часть же некая глиняна, часть некая царства будет крепка и от него будет сокрушена. ⁴³ Яко видел еси железо смешено со глиною, смешены будут во племени человечи, и не будут прилепляющеся сей к сему, якоже железо не смешается со глиною. ⁴⁴ И во днех царей тех возставит Бог небесный царство, еже во веки не разсыплется, и царство его людем инем не останется, истнит и развеет вся царства, тое же станет во веки, ⁴⁵ якоже видел еси, яко отсечеся от горы камень без рук и истни глину, железо, медь, сребро, злато. Бог великий возвести царю, имже подобает быти по сих: и истинен сон, и верно сказание его. ⁴⁶ Тогда царь навуходоносор паде на лице и поклонися даниилу, и рече дары и благовония возлияти ему. ⁴⁷ И отвещав царь рече даниилу: поистинне Бог ваш той есть Бог богов и Господь господей и Царь царей, открываяй тайны, понеже возмогл еси открыти тайну сию. ⁴⁸ И возвеличи царь даниила, и дары велики и многи даде ему, и постави его над всею страною вавилонскою и князя воеводам, над всеми мудрыми вавилонскими. ⁴⁹ И даниил проси у царя и пристави над делы страны вавилонския седраха, мисаха и авденаго. Даниил же бяше во дворе цареве.