¹ И бысть слово Господне ко мне глаголя: ² сыне человечь, обрати лице твое к горе сеир и прорцы на ню и рцы ей: ³ сия глаголет адонаи Господь: се, аз на тя, горо сеир, и простру руку мою на тя и поставлю тя пусту, и опустееши, ⁴ и во градех твоих пустыню сотворю, и ты в пустыню будеши, и уразумееши, яко аз есмь Господь. ⁵ Понеже бысть в тебе вражда вечная, и приседела еси дому израилеву лукавством, рукою врагов с мечем во время печали их и во время неправды, на последок: ⁶ сего ради живу аз, глаголет адонаи Господь, понеже в крови согрешила еси, и кровь поженет тя, кровь возненавидела еси, и кровь ижденет тя. ⁷ И поставлю гору сеир пусту и опустевшу, и погублю от нея человеки и скоты, (и приходяща и отходяща:) ⁸ и наполню язвеными твоими холмы твоя и дебри твоя, и на всех полех твоих язвении мечем падут в тебе: ⁹ и пусту во век поставлю тя, и гради твои не населятся ктому, и уразумееши, яко аз есмь Господь. ¹⁰ Понеже рекла еси: оба языка и обе стране мои будут, и возму их в наследие, а Господь тамо есть: ¹¹ сего ради живу аз, глаголет адонаи Господь, и сотворю тебе по вражде твоей и по ревности твоей, юже сотворила еси от ненавидения к ним, и познан буду тобою, егда имам тебе судити, и уразумееши, яко аз есмь Господь. ¹² Слышах глас всех хулений твоих, яже глаголала еси: горы израилевы пусты даны нам во снедь: ¹³ и велеречила еси на мя усты твоими и умножила на мя словеса, аз же услышах. ¹⁴ Сего ради тако глаголет адонаи Господь: во веселии всея земли пусту тя сотворю: ¹⁵ якоже порадовалася еси о наследии дому израилева, яко погибе, тако сотворю тебе: пуста будеши, горо сеир, и вся идумеа потребится, и уведят, яко аз есмь Господь Бог их.