¹ Бысть же глад на земли, кроме глада бывшаго прежде во время авраамле. Отиде же исаак ко авимелеху царю филистимску в герар: ² явися же ему Господь и рече: не ходи во египет, вселися же в земли, в нейже ти реку, ³ и обитай в земли той, и буду с тобою, и благословлю тя: тебе бо и семени твоему дам всю землю сию и поставлю клятву мою, еюже кляхся аврааму отцу твоему: ⁴ и умножу семя твое, яко звезды небесныя, и дам семени твоему всю землю сию: и благословятся о семени твоем вси языцы земнии: ⁵ понеже послуша отец твой авраам моего гласа и соблюде заповеди моя и повеления моя, и оправдания моя и законы моя. ⁶ Вселися же исаак в герарех. ⁷ Вопросиша же мужие места того о ревекце жене его, и рече: сестра ми есть. Убояся бо рещи, яко жена ми есть, да не когда убиют его мужие места того ревекки ради, понеже бе доброзрачна. ⁸ Бысть же много время тамо: и приникнув авимелех царь герарский окном, виде исаака играюща с ревеккою женою своею. ⁹ Призва же авимелех исаака и рече ему: убо жена твоя есть? почто рекл еси, яко сестра ми есть? Рече же ему исаак: рех бо, да не умру ея ради. ¹⁰ Рече же ему авимелех: что сие сотворил еси нам? вмале не бысть некто от рода моего с женою твоею, и навел бы еси на ны неведение. ¹¹ Заповеда же авимелех всем людем своим, глаголя: всяк, иже прикоснется мужу сему, или жене его, смерти повинен будет. ¹² Сея же исаак в земли той, и приобрете в то лето стократный плод ячменя: благослови же его Господь. ¹³ И возвысися человек, и преуспевая болший бываше, дондеже велик бысть зело. ¹⁴ Быша же ему скоти овец и скоти волов и земледелия многа. Позавидеша же ему филистимляне: ¹⁵ и вся кладязи, яже ископаша раби отца его, во время отца его, заградиша я филистимляне и наполниша тыя землею. ¹⁶ Рече же авимелех ко исааку: отиди от нас, яко силнейший сотворился еси от нас зело. ¹⁷ И отиде оттуду исаак и обита в дебри герарстей, и вселися тамо. ¹⁸ И паки исаак ископа кладязи водныя, яже ископаша раби авраама отца его, и заградиша тыя филистимляне, по умертвии авраама отца его: и прозва им имена, по именам, имиже прозва авраам отец его. ¹⁹ И ископаша раби исааковы в дебри герарстей, и обретоша тамо кладязь воды живы. ²⁰ И пряхуся пастырие герарстии с пастырми исааковыми, глаголюще: наша есть вода. И прозва имя кладязю тому обида: обидяху бо его. ²¹ Отшед же оттуду исаак, ископа кладязь другий. Пряхуся же и о том: и прозва имя ему вражда. ²² Отшед же оттуду, ископа кладязь другий. И не пряхуся о том, и прозва имя ему пространство, глаголя: яко ныне распространи Господь нам и возрасти нас на земли. ²³ Взыде же оттуду ко кладязю клятвенному: ²⁴ и явися ему Господь в ту нощь и рече: аз есмь Бог авраама отца твоего, не бойся, с тобою бо есмь: и благословлю тя, и умножу семя твое авраама ради отца твоего. ²⁵ И созда тамо жертвенник, и призва имя Господне: и постави тамо скинию свою: ископаша же тамо раби исааковы кладязь в дебри герарстей. ²⁶ И авимелех прииде к нему от герар, и охозаф невестоводитель его, и фихол воевода сил его. ²⁷ И рече им исаак: вскую приидосте ко мне? вы же возненавидесте мене и отсласте мя от себе. ²⁸ Они же реша: видевше узрехом, яко бе Господь с тобою, и рехом: буди клятва между нами и между тобою, и завещаим с тобою завет, ²⁹ да не сотвориши с нами зла, якоже не возгнушахомся тобою мы, и якоже сотворихом тебе добро, и отпустихом тя с миром: и ныне благословен ты от Господа. ³⁰ И сотвори им пир, и ядоша и пиша. ³¹ И воставше заутра, клятся кийждо ближнему: и отпусти я исаак, и отидоша от него здравы. ³² Бысть же в той день, и пришедше раби исааковы поведаша ему о кладязе, егоже ископаша, и рекоша: не обретохом воды. ³³ И прозва его клятва. Сего ради прозва имя граду оному кладязь клятвенный, даже до днешняго дне. ³⁴ Бяше же исав лет четыредесяти: и поя жену иудифу, дщерь веоха хеттеина, и васемафу, дщерь елона хеттеина. ³⁵ И быша противящеся исаакови и ревекце.