¹ И бысть слово Господне ко мне глаголя: ² сыне человечь, утверди лице твое на сыны аммони и прорцы на ня, ³ и речеши сыном аммоним (глаголя): слышите слово Господа адоная, сия глаголет адонаи Господь: понеже порадовастеся о святых моих, яко осквернена быша, и о земли израилеве, яко погибе, и о дому иудине, яко отиде в пленение: ⁴ того ради, се, аз предаю вас сыном кедемлим в наследие, и вселятся со имением своим в тебе и поставят в тебе селения своя: тии поядят плоды твоя, и тии испиют тук твой: ⁵ и дам град аммонь паствы велблюдов и сыны аммони на паству овец, и уразумеете, яко аз адонаи Господь. ⁶ Сего ради тако глаголет Господь Бог: понеже восплескал еси рукою твоею и потоптал ногою твоею и порадовался еси душею твоею о земли израилеве, ⁷ того ради, се, аз простру руку мою на тя и дам тя в разграбление языком, и потреблю тя от людий и погублю тя от стран пагубою, и увеси, яко аз адонаи Господь. ⁸ Сия глаголет адонаи Господь: понеже рече моав и сиир: се, якоже вси языцы, дом израилев и иуда, ⁹ сего ради, се, аз разслаблю мышцу моавлю от градов крайних его, избранную землю, дом иасимуфов над источником града приморскаго (ваелмона и кариафаима): ¹⁰ сыны кедемли на сыны аммони дах я в наследие, яко да не будет памяти сынов аммоних во языцех: ¹¹ и в моаве сотворю отмщение, и уведят, яко аз Господь. ¹² Сия глаголет адонаи Господь: понеже сотвори идумеа, егда отмстиша тии отмщением (во гневе) дому иудову, и памятозлобствоваша и отмстиша прю от них: ¹³ того ради сия глаголет адонаи Господь: простру руку мою на идумею и потреблю от нея человеки и скот и поставлю ю пусту, и от феман гоними мечем падут: ¹⁴ и дам отмщение мое на идумею рукою людий моих израиля, и сотворят во идумеи по гневу моему и по ярости моей, и уведят отмщение мое, глаголет адонаи Господь. ¹⁵ Сего ради сия глаголет адонаи Господь: понеже сотвориша иноплеменницы во отмщении и возставиша месть радующеся всею душею еже потребити даже до века, ¹⁶ того ради сия глаголет адонаи Господь: се, аз простру руку мою на иноплеменники, и потреблю критян, и погублю оставшыя живущыя на примории, ¹⁷ и сотворю в них отмщение велико, во обличениих ярости моея, и уразумеют, яко аз адонаи Господь, егда дам отмщение мое на ня.