¹ И бысть слово Господне ко мне глаголя: ² сего ради прорцы, сыне человечь, и утверди лице твое на Иерусалим и воззри на святыни их, и прорцы на землю израилеву, ³ и речеши ко земли израилеве: сия глаголет адонаи Господь: се, аз на тя, и извлеку мечь мой из ножен его, и потреблю от тебе неправеднаго и беззаконнаго. ⁴ Понеже потреблю от тебе неправеднаго и беззаконника, тако изыдет мечь мой из ножен своих на всяку плоть от юга даже до севера, ⁵ и увесть всяка плоть, яко аз Господь извлекох мечь мой из ножен его, и ктому не возвратится. ⁶ И ты, сыне человечь, воздохни в сокрушении чресл твоих и в болезнех возстени пред очима их. ⁷ И будет, аще рекут к тебе: чесо ради ты стенеши? и речеши: о возвещении, яко грядет: и сокрушится всяко сердце, и ослабеют вся руки, и издшет всяка плоть и всяк дух, и вся стегна осквернавятся мокротою: се, грядет и будет, глаголет адонаи Господь. ⁸ И быти слово Господне ко мне глаголя: ⁹ сыне человечь, прорцы и речеши: сия глаголет адонаи Господь: рцы: мечу, мечу! изострися и разярися, ¹⁰ яко да изсечеши сечения: изострися, яко да будеши в блещание и готов на разсыпание: сецы, изничтожай, отрини всякое древо. ¹¹ И даде его уготованна, еже держати в руках его: наострился мечь, готов есть, еже дан быти в руце секущаго. ¹² Возопий и восплачися, сыне человечь, яко сей бысть в людех моих, сей во всех старейшинах израилевых: обитающии близ под мечь быша с людьми моими: сего ради восплещи рукама твоима, ¹³ яко оправдася. И что, аще и племя отринется? Не будет, глаголет адонаи Господь. ¹⁴ И ты, сыне человечь, прорцы и восплещи рукама и усугуби мечь: третий мечь язвеным есть, мечь язвеным велик, и ужасиши я, ¹⁵ яко да сокрушится сердце их, и умножатся немощнии во всех вратех их, предаются на усечение мечное: благо остр бысть на сечение, благо бысть на блистание. ¹⁶ Проходи яко молния, острися одесную и ошуюю, аможе аще лице твое востанет: ¹⁷ и аз восплещу рукою моею к руце моей и напущу ярость мою, аз Господь глаголах. ¹⁸ И бысть слово Господне ко мне глаголя: ¹⁹ и ты, сыне человечь, учини себе пути два, еже внити мечу царя вавилонска, от страны единыя изыдут начала два, и руку уготовают в начале пути града, от начала пути учиниши, ²⁰ яко внити мечу на равваф сынов аммоних и на иудею и на Иерусалим среде его. ²¹ Понеже станет царь вавилонск на старем пути, на начале обоих путий, еже волхвовати волхвованием, якоже вскипети жезлу, и вопрошати ваяных и вражити во утробах. ²² И бысть одесную его волшебство на Иерусалим, еже обставити острог и еже отверсти уста с воплем и возвысити глас со глашением трубным, и яко поставити острог пред враты его и насыпати персти и поставити стрелницы. ²³ И той аки волхвуя им волхвование пред ними, уседмеряя седмерицы, и той воспоминаяй неправды его помянути. ²⁴ Того ради сия глаголет адонаи Господь: понеже воспомянусте неправды вашя, внегда открышася нечестия ваша, яко явитися грехом вашым во всех беззакониих ваших и во всех начинаниих ваших, понеже воспомянусте, в тех яти будете. ²⁵ И ты, сквернаве, беззаконниче, старейшино израилев, егоже грядет день во время неправды, конец: ²⁶ сия глаголет Господь: сними кидар и отложи венец, сей не таков будет, смирил еси высокое и вознесл смиренное: ²⁷ неправду, неправду, неправду положу его, и той не таков будет, дондеже приидет, емуже достоит, и предам ему. ²⁸ И ты, сыне человечь, прорцы и речеши: се глаголет адонаи Господь к сыном аммоним и ко укоризне их, и речеши: мечу, мечу извлеченый на сечение, извлеченый на скончание, двигнися, яко да блистаеши: ²⁹ в видении твоем суетнем, и внегда вражбити тебе ложная, егда предаешися ты на выи язвеных беззаконников, ихже день приспе во время неправды, конец: ³⁰ возвратися в ножны твоя и не стани на месте сем, в немже родился еси, на земли твоей имам тя судити: ³¹ и излию на тя гнев мой, во огни гнева моего дуну на тя и предам тя в руце мужей варвар, творящих пагубу: ³² огню будеши ядь, кровь твоя будет посреде земли твоея: не будет твоея памяти, занеже аз Господь глаголах.