¹ И бысть слово Господне ко мне глаголя: ² сыне человечь, что было бы древо лозное от всех древес гроздных, сущих во древесех дубравных? ³ Аще возмут от него древо, еже сотворити дело? и аще возмут кол от него, еже обесити на нем кий либо сосуд? ⁴ Разве еже огневи предастся на потребление, летнее очищение его потребляет огнь, и изчезает до конца: еда потребно будет на дело? ⁵ И еще целу ему сущу не будет на дело, кольми паче аще огнь е попалит до конца, будет ли на дело потом? ⁶ Сего ради рцы: сице глаголет Господь Бог: якоже лоза виноградная во древех дубравных, юже дах на потребление огневи, тако дам живущыя во Иерусалиме: ⁷ и дам лице мое на ня, от огня изыдут, и огнь пояст я: и уведят, яко аз Господь, егда утвержду лице мое на них: ⁸ и дам землю в пагубу, зане впадоша в грех, глаголет адонаи Господь.