¹ И бысть слово Господне ко мне глаголя: ² сыне человечь, посреде неправд их ты живеши, иже очи имут видети, и не видят, и ушы имут, еже слышати, и не слышат, зане дом преогорчеваяй есть. ³ И ты, сыне человечь, сотвори себе сосуды пленнически, и пленен буди днем пред ними, и преселен буди от места твоего на место другое пред ними, яко да видят, зане дом прогневляяй есть. ⁴ И да изнесеши сосуды твоя, яко сосуд пленнический, днем пред очима их: ты же изыдеши в вечер пред ними, якоже исходит пленник. ⁵ Прокопай себе стену, и да изыдеши сквозе ю пред ними. ⁶ На раменех взят будеши и покровен изыдеши, лице твое покрыеши, и да не видиши земли, понеже чудо тя дах дому израилеву. ⁷ И сотворих тако все, елико ми заповеда Господь: и сосуды изнесох яко сосуды пленничы днем, и в вечер прокопах себе стену рукою, и отай изыдох, и на рамена взят бых пред ними. ⁸ И бысть слово Господне заутра ко мне глаголя: ⁹ сыне человечь, не реша ли к тебе дом израилев, дом прогневляяй: что ты твориши? ¹⁰ Рцы к ним: тако глаголет Господь Бог: ко князю и старейшинам Иерусалимлим, и всему дому израилеву, иже суть среде их, ¹¹ рцы, яко аз чудеса творю, якоже сотворих, сице им будет: во преселении и во пленении изыдут. ¹² И князь среде их на рамена взят будет, и отай изыдет сквозе стену, и прокопает, еже ему изыти сквозе ю, лице свое покрыет, да не видимь будет очесы, и сам земли не узрит. ¹³ И простру мрежу мою нань, и ят будет во одержании моем, и введу его в вавилон в землю халдейску, и не узрит ея, и тамо скончается. ¹⁴ И вся, иже окрест его, помощники его, и вся заступающыя его разсею по всем ветром, и мечь излию вслед их: ¹⁵ и уведят, яко аз Господь, егда разсыплю я во языки и разсею я по странам: ¹⁶ и оставлю от них мужы в число от меча и от глада и от смерти, яко да поведят вся беззакония их во языцех, аможе внидут: и уведят, яко аз Господь. ¹⁷ И бысть слово Господне ко мне глаголя: ¹⁸ сыне человечь, хлеб твой с болезнию снеси и воду твою со страданием и скорбию испиеши. ¹⁹ И речеши к людем земли: сия глаголет адонаи Господь живущым в Иерусалиме на земли израилеве: хлебы своя с недостатком снедят и воду свою с пагубою испиют: яко да погибнет земля со исполнением своим, в нечестии бо вси живущии в ней. ²⁰ И гради их населеннии опустеют, и земля их в погибель будет, и увесте, яко аз Господь. ²¹ И бысть слово Господне ко мне глаголя: ²² сыне человечь, кая притча сия вам на земли израилеве, глаголющым: долги дни, погибе всякое видение? ²³ Сего ради рцы к ним: тако глаголет адонаи Господь: отвращу притчу сию, и потом не рекут притчи тоя дом израилев, яко речеши к ним: приближишася дние и слово всякаго видения. ²⁴ Зане не будет ктому всякое видение ложное, и волхвуяй угодная среде сынов израилевых. ²⁵ Яко аз Господь возглаголю словеса моя, возглаголю и сотворю и не продолжу ктому: во дни вашя, доме прогневаяй, реку слово и сотворю, глаголет адонаи Господь. ²⁶ И бысть слово Господне ко мне глаголя: ²⁷ сыне человечь, се, дом израилев преогорчеваяй глаголюще глаголют: видение, еже сей видит, на дни многи, и на времена долга сей прорицает. ²⁸ Сего ради рцы к ним: сия глаголет Господь Бог: не продолжатся ктому вся словеса моя, яже возглаголю: яко возглаголю слово и сотворю, глаголет адонаи Господь.