¹ И воздвиже мя дух и возведе мя ко вратом дому Господня, яже прямо зрят на восток: и се, пред преддверием врат яко двадесять и пять мужей: и видех среде их иехонию сына иазерова и фалтию ванеова, старейшины людския. ² И рече Господь ко мне: сыне человечь, сии мужие помышляющии суетная и совет творящии лукав во граде сем, ³ глаголющии: не в нове ли соградишася домове? сей есть коноб, мы же мяса. ⁴ Сего ради прорцы на ня, прорцы, сыне человечь. ⁵ И нападе на мя дух Господень и рече ко мне: глаголи, сия глаголет Господь: тако рекосте, доме израилев, и умышления духа вашего аз вем: ⁶ умножисте мертвецы вашя во граде сем и наполнисте пути его язвенных. ⁷ Того ради тако глаголет адонаи Господь: мертвецы ваши, яже избисте среде его, тии суть мяса, а сей коноб есть, и вас изведу от среды его. ⁸ Меча боитеся, и мечь наведу на вас, глаголет адонаи Господь: ⁹ и изведу вас от среды его и предам вас в руце чуждих и сотворю в вас суд: ¹⁰ мечем падете, на горах израилевых сужду вам, и увесте, яко аз Господь: ¹¹ той не будет вам в коноб, и вы не будете посреде его в мяса: на горах израилевых сужду вам, ¹² и увесте, яко аз Господь, яко по заповедем моим не ходисте и судов моих не сотвористе, но по обычаем языков сущих окрест вас сотвористе. ¹³ И бысть внегда прорицати ми, и фалтиа сын ванеов умре: и падох ниц и возопих гласом великим, глаголя: горе мне, люте мне, адонаю Господи! на скончание ли твориши ты останки израилевы? ¹⁴ И бысть слово Господне ко мне глаголя: ¹⁵ сыне человечь, братия твоя и мужие плена твоего и весь дом израилев скончася, имже рекоша живущии во Иерусалиме: далече удалитеся от Господа, нам дана есть земля в наследие. ¹⁶ Сего ради рекох: сия глаголет адонаи Господь: яко отрину я во языки и разсею я по всей земли, и буду им во освящение мало во странах, аможе внидут тамо. ¹⁷ Сего ради рцы: сия глаголет адонаи Господь: и прииму я от язык и соберу я от стран, идеже разсеях я в них, и дам им землю израилеву: ¹⁸ и внидут тамо и отвергут вся мерзости ея и вся беззакония ея от нея: ¹⁹ и дам им сердце ино и дух нов дам им, и исторгну каменное сердце от плоти их и дам им сердце плотяно, ²⁰ яко да в заповедех моих ходят и оправдания моя сохранят и сотворят я: и будут ми в люди, и аз им буду в Бога. ²¹ А ихже сердце по гнусностем их и по беззаконием их ходит, пути тех на главы их положу, глаголет адонаи Господь. ²² И воздвигоша херувими крила своя, и колеса держащаяся их: слава же Бога израилева бе на них свыше их. ²³ И взыде слава Господня от среды града и ста на горе, яже бяше прямо града на восток. ²⁴ И дух взя мя и принесе мя на землю халдейску в пленники, в видении, духом Божиим. ²⁵ И взыдох от видения, еже видех, и глаголах ко пленником вся словеса Господня, яже показа мне.