¹ Ты же, сыне человечь, возми себе мечь остр паче бритвы стригущаго, притяжи его себе и возложи его на главу твою и на браду твою: и возми превес весов, и размериши я. ² Четвертую часть да сожжеши на огни среде града по исполнению дний затворения: ³ и да возмеши четвертую часть и сожжеши ю среде града, четвертую же часть содробиши мечем окрест его, и четвертую часть разсыплеши ветром: и мечь извлеку вслед их. ⁴ И возмеши оттуду мало их числом и ввяжеши я во одежду твою: и от техже возмеши еще и ввержеши я среде огня и сожжеши я на огни: и от того изыдет огнь на весь дом израилев. и речеши всему дому израилеву: ⁵ сия глаголет адонаи Господь: сей Иерусалим, посреде языков положих его, и страны, яже окрест его. ⁶ И речеши: измени оправдания моя паче языков, и законы моя паче стран, яже окрест его: понеже оправдания моя отринуша и по законом моим не ходиша в них. ⁷ Сего ради тако глаголет адонаи Господь: понеже вина ваша паче язык, иже окрест вас, и не ходисте и законех моих и оправданий моих не сотвористе, но и по судом языческим, яже окрест вас, не сотвористе: ⁸ сего ради сия глаголет адонаи Господь: се, аз на тя, и сотворю среде тебе суд пред языки, ⁹ и сотворю среде тебе, ихже не сотворих и ихже не сотворю подобных им ктому, по всем мерзостем твоим. ¹⁰ Сего ради отцы снедят чад среде тебе, и чада снедят отцев: и сотворю в тебе суды, и разсею вся оставшая от тебе по всему ветру. ¹¹ Сего ради живу аз, глаголет адонаи Господь, воистинну понеже святая моя осквернил еси всеми мерзостьми твоими, и аз отрину тя, и не пощадит око мое, и аз не помилую тя. ¹² Четверть тебе смертию потребится, и четверть тебе гладом скончается среде тебе, четверть же тебе падет мечем окрест тебе, четверть же тебе разсыплю по всему ветру, и мечь извлеку вслед их. ¹³ И скончается ярость моя и гнев мой на них, и утешуся, и уведят, яко аз Господь глаголах во рвении моем, внегда скончати ми гнев мой на них. ¹⁴ И положу тя в пустыню и во укоризну языком сущым окрест тебе и пред всяким проходящим. ¹⁵ И будеши во стенание и ужас, наказанием и пагубою во языцех, иже окрест тебе, егда сотворю в тебе суды во гнев и в ярость и во отмщение ярости моея: аз Господь глаголах: ¹⁶ и егда послю стрелы глада на ня, и будут во скончание, и послю растлити вы, и глад соберу на вы, и сотру утверждение хлеба твоего, ¹⁷ и испущу на тя глад и звери люты, и умучу тя, смерть же и кровь пройдут сквозе тя, и мечь наведу на тя окрест: аз Господь глаголах.