¹ И ты, сыне человечь, возми себе плинфу и положи ю пред лицем твоим, и да напишеши на ней град Иерусалим, ² и да даси окрест его ограждение, и да соградиши над ним забрала и обложиши его острогом, и да поставиши окрест его полки и да учиниши поставления стрельниц окрест: ³ ты же возми себе сковраду железну, и да положиши ю в стену железну между тобою и между градом, и да уготовиши лице твое нань, и будет в затворе, и затвориши и: знамение сие есть сыном израилевым. ⁴ Ты же да спиши на левем боку твоем, и да положиши неправды дому израилева на нем, по числу дний пятьдесят и сто, в няже поспиши на нем, и возмеши неправды их. ⁵ И аз дах тебе две неправды их в число дний, в девятьдесят и сто дний, и возмеши неправды дому израилева. ⁶ И совершиши сия, и поспиши на десных ребрех твоих второе, и возмеши неправды дому иудина четыредесять дний, день за едино лето положих тебе. ⁷ И на заключение Иерусалима да уготоваеши лице твое, и мышцу твою утвердиши, и пророчествовати будеши на него. ⁸ И се, аз дах на тя узы, и не превратишися от ребр твоих на ребра твоя, дондеже скончаются дние заключения твоего. ⁹ Ты же (сыне человечь) возми себе пшеницу и ячмень, и боб и лящу, и просо и пыро, и вложиши я в сосуд един глинян: и сотвориши я себе в хлебы, и по числу дний, в няже спиши на ребрех твоих, девятьдесят и сто дний ясти будеши оныя. ¹⁰ Ядь же твоя, юже ясти будеши, весом двадесять сикль на день, от времене до времене снеси сия. ¹¹ И воду мерою пити будеши, и шестую часть ина от времене до времене испиеши. ¹² И опреснок ячменный снеси я, в лайне мотыл человечих сокрыеши я пред очима их ¹³ и речеши: сия глаголет Господь Бог израилев: тако снедят сынове израилевы хлеб свой нечист во языцех, аможе разсыплю я. ¹⁴ И рех: никакоже, Господи Боже израилевъ! се, душа моя не осквернилася в нечистоте, и мертвечины и звероядины не ядох от рождения моего даже доныне, ниже вниде во уста моя всякое мясо мерзко и сквернаво. ¹⁵ И рече ко мне: се, дах тебе мотыла говяжая вместо мотыл человечих, и сотвориши хлебы себе в них. ¹⁶ И рече ко мне: сыне человечь, се, аз сотру утверждение хлебное во Иерусалиме, и снедят хлеб весом и во оскудении, и воду мерою и в пагубе испиют, ¹⁷ яко да скудни будут хлебом и водою: и погибнет человек и брат его, и истают в неправдах своих.