¹ Бысть же житие саррино лет сто двадесять седмь. ² И умре сарра во граде арвоце, иже есть в раздолии: сей есть хеврон в земли ханаанстей. Прииде же авраам рыдати по сарре и плакати. ³ И воста авраам от мертвеца своего и рече сыном хеттеовым, глаголя: ⁴ преселник и пришлец аз есмь у вас, дадите ми убо стяжание гроба между вами, да погребу мертвеца моего от мене. ⁵ Отвещаша же сынове хеттеовы ко аврааму, глаголюще: ни, господине: ⁶ послушай же нас: царь от Бога ты еси в нас: во избранных гробех наших погреби мертвеца твоего: никтоже бо от нас возбранит гроба своего от тебе, еже погребсти мертвеца твоего тамо. ⁷ Востав же авраам поклонися народу земли, сыном хеттеовым, ⁸ и рече к ним авраам, глаголя: аще имате в души вашей, яко погребсти мертвеца моего от лица моего, послушайте мене и рцыте о мне ефрону саарову: ⁹ и да даст ми пещеру сугубую, яже есть его, сущую на части села его: сребром достойным да даст ми ю у вас в стяжание гроба. ¹⁰ Ефрон же седяше посреде сынов хеттеовых. Отвещав же ефрон хеттейский ко аврааму, рече слышащым сыном хеттеовым и всем приходящым во град, глаголя: ¹¹ у мене буди, господине, и послушай мене: село и пещеру яже в нем, тебе даю: пред всеми гражданы моими дах тебе, погреби мертвеца твоего. ¹² И поклонися авраам пред народом земли ¹³ и рече ефрону во ушеса пред всем народом земли: понеже по мне еси, послушай мене: сребро села возми у мене, и погребу мертвеца моего тамо. ¹⁴ Отвеща же ефрон аврааму, глаголя: ¹⁵ ни, господине: слышах бо, яко земля четырех сот дидрахм сребра: но что было бы сие между мною и тобою? ты же мертвеца твоего погреби. ¹⁶ И послуша авраам ефрона, и даде авраам ефрону сребро, еже глагола во ушеса сынов хеттеовых, четыре ста дидрахм сребра искушена купцами. ¹⁷ И бысть село ефроново, еже бе в сугубей пещере, еже есть лицем к мамврии, село и пещера яже бе в нем, и всякое древо, иже бе на селе, и все еже есть в пределех его окрест, ¹⁸ аврааму (бысть) в стяжание пред сыны хеттеовыми и пред всеми приходящими во град. ¹⁹ По сих погребе авраам сарру жену свою в пещере селней сугубей, яже есть противу мамврии: сия есть хеврон в земли ханаанстей. ²⁰ И утверждено есть село и пещера, яже бе на нем, аврааму в стяжание гроба от сынов хеттеовых.