¹ И бысть по глаголех сих, Бог искушаше авраама и рече ему: аврааме, аврааме. И рече: се аз. ² И рече: поими сына твоего возлюбленнаго, егоже возлюбил еси, исаака, и иди на землю высоку и вознеси его тамо во всесожжение, на едину от гор, ихже ти реку. ³ Востав же авраам утро, оседла осля свое: поят же с собою два отрочища и исаака сына своего: и растнив дрова во всесожжение, востав иде, и прииде на место, еже рече ему Бог, в третий день. ⁴ И воззрев авраам очима своима, виде место издалече. ⁵ И рече авраам отроком своим: сядите зде со ослятем: аз же и детищь пойдем до онде, и поклонившеся возвратимся к вам. ⁶ Взя же авраам дрова всесожжения и возложи на исаака сына своего: взя же в руки и огнь, и ножь, и идоста оба вкупе. ⁷ Рече же исаак ко аврааму отцу своему: отче. Он же рече: что есть, чадо? Рече же: се, огнь и дрова, где есть овча еже во всесожжение? ⁸ Рече же авраам: Бог узрит себе овча во всесожжение, чадо. Шедша же оба вкупе, ⁹ приидоста на место, еже рече ему Бог: и созда тамо авраам жертвенник и возложи дрова: и связав исаака сына своего, возложи его на жертвенник верху дров. ¹⁰ И простре авраам руку свою, взяти ножь, заклати сына своего. ¹¹ И воззва и ангел Господень с небесе, и рече: аврааме, аврааме. Он же рече: се, аз. ¹² И рече: да не возложиши руки твоея на отрочища, ниже да сотвориши ему что: ныне бо познах, яко боишися ты Бога, и не пощадел еси сына твоего возлюбленнаго мене ради. ¹³ И воззрев авраам очима своима виде, и се, овен един держимый рогама в саде савек: и иде авраам, и взя овна, и вознесе его во всесожжение вместо исаака сына своего. ¹⁴ И нарече авраам имя месту тому: Господь виде: да рекут днесь: на горе Господь явися. ¹⁵ И воззва ангел Господень авраама вторицею с небесе, ¹⁶ глаголя: мною самем кляхся, глаголет Господь, егоже ради сотворил еси глагол сей и не пощадел еси сына твоего возлюбленнаго мене ради: ¹⁷ воистинну благословя благословлю тя, и умножая умножу семя твое, яко звезды небесныя, и яко песок вскрай моря: и наследит семя твое грады супостатов, ¹⁸ и благословятся о семени твоем вси языцы земнии, занеже послушал еси гласа моего. ¹⁹ Возвратися же авраам ко отроком своим, и воставше идоша купно ко кладязю клятвенному: и вселися авраам у кладязя клятвеннаго. ²⁰ Бысть же по глаголех сих, и поведаша аврааму, глаголюще: се, роди мелха и та сыны брату твоему нахору, ²¹ окса первенца, и вавкса брата его, и камуила отца сирска, ²² и хазада, и азава, и фалдеса, и елдафа, и вафуила: ²³ вафуил же роди ревекку: осмь сии сынове, ихже роди мелха нахору брату авраамлю: ²⁴ и наложница его, ейже имя ревма, роди и сия тавека, и таама, и тохоса, и моха.