¹ Слово, еже рече Господь на вавилон и на землю халдейскую иеремиею пророком. ² Возвестите во языцех и слышано сотворите, воздвигните знамение, возопийте и не скрывайте, рцыте: пленен бысть вавилон, посрамися вил, победися меродах, посрамишася изваяния его, сокрушишася кумиры их. ³ Яко прииде нань язык от севера, той положит землю его в запустение, и не будет живяй в ней от человека даже и до скота: подвигнушася, отидоша. ⁴ В тыя дни и в то время, глаголет Господь, приидут сынове израилевы, тии и сынове иудины вкупе ходяще и плачуще пойдут и Господа Бога своего взыщут. ⁵ Во сион испытают стези, тамо бо обративше лица своя приидут и приложатся ко Господу заветом вечным, иже забвению не предастся. ⁶ Овцы погибшыя быша людие мои, пастырие их совратиша их и сотвориша я крытися по горам: с горы на холм ходиша. ⁷ Забыша ложа своего, вси обретающии их снедаху их, и врази их рекоша: не пощадим их, зане согрешиша Господу, пажить правды, собирающему отцев их Господу. ⁸ Отидите от среды вавилона и от земли халдейски изыдите, и будите яко козлища пред овцами. ⁹ Яко се, аз воздвигну и приведу на вавилон собрания языков великих от земли полунощныя, и ополчатся нань: оттуду пленен будет, якоже стрела мужа сильна искусна и возвратится праздна. ¹⁰ И будет земля халдейска в разграбление, вси грабителе ея наполнятся глаголет Господь: ¹¹ зане веселистеся и велеречивасте, расхищающе наследие мое, скакасте бо яко телцы на траве и бодосте якоже волы. ¹² Поругана бысть мати ваша зело, и посрамися родившая вас: се, последняя во языцех пуста и непроходна и суха. ¹³ От гнева Господня не поживут во век: но будет весь в запустение, и всяк ходяй сквозе вавилон подивится и позвиждет над всякою язвою его. ¹⁴ Ополчитеся на вавилон, вси окрестнии наляцающии лук, стреляйте нань, не щадите стрел ваших, понеже пред Господем согреши, ¹⁵ возмите его: ослабеша руце его, падоша основания его, сокрушишася забрала его, яко месть Господня есть: отмстите ему, якоже сотвори, сотворите ему: ¹⁶ потребите семя от вавилона, и держащаго серп во время жатвы от лица меча еллинска, кийждо к людем своим обратится, и кийждо в землю свою убежит. ¹⁷ Овча заблуждающее израиль, львове изнуриша е: первее яде его царь ассур, сей же последний и кости оглода ему навуходоносор царь вавилонский. ¹⁸ Сего ради тако глаголет Господь вседержитель, Бог израилев: се, аз посещу на царя вавилонска и на землю его, якоже посетих на царя ассурска, ¹⁹ и возведу паки израиля на пажить его, и упасется в кармиле и васане, и в горе ефремли и в галааде, и насытится душа его. ²⁰ В тыя дни и в той час, глаголет Господь, поищут неправды израилевы, и не будет, и грехов иудиных, и не обрящутся: яко милостив буду им оставшымся. ²¹ На землю владеющих взыди и на живущих в ней посети, разори и убий сущыя по них, глаголет Господь, и сотвори вся, елика заповедаю тебе. ²² Глас брани и сотрение велико в земли халдейстей. ²³ Како сокрушися и сотреся млат всея земли? како обратися в пустыню вавилон во языцех? ²⁴ Взыдут на тя, и пленен будеши, и не познаеши, яко вавилон еси: обретен и ят еси, понеже разгневал еси Господа. ²⁵ Отверзе Господь сокровища своя и изнесе сосуды гнева своего, яко дело есть Господу вседержителю в земли халдейстей: ²⁶ яко приидоша времена его: отверзите хранилища его и испытайте и, аки вертеп, и погубите его, да не будет останка его. ²⁷ Изсушите вся плоды его, и да снидут в заклание: горе им, яко прииде день их и час отмщения их. ²⁸ Глас бежащих и избегших от земли вавилонския, да возвестят в сионе отмщение Господа Бога нашего, отмщение храма его. ²⁹ Возвестите на вавилон многим, всем наляцающым лук, ополчитеся нань окрест: да не убежит ни един из него: воздайте ему по делом его, по всему, елика сотвори, сотворите ему, яко воста на Господа Бога святаго израилева. ³⁰ Сего ради падут юноши его на стогнах его, и вси мужие воинстии его низвержени будут в той день, глаголет Господь. ³¹ Се, аз на тя, горде, глаголет Господь Бог вседержитель, яко прииде день твой и час посещения твоего: ³² и падет гордыня твоя и разрушится, и не будет возставляяй ю: и возжгу огнь в дубраве его, и пояст вся окрестная его. ³³ Тако глаголет Господь вседержитель: порабощение терпят сынове израилевы и сынове иудины, вкупе вси пленившии их поработиша их, не хощут бо отпустити их. ³⁴ Избавитель же их сильный, Господь вседержитель имя ему, судом судити имать супостаты своя, яко да избавит землю, и потрясет жительми вавилонскими. ³⁵ Мечь на халдеев, глаголет Господь, и на жители вавилонския, и на князи и на мудрыя его, ³⁶ мечь на обаятели его, и буии будут, и мечь на сильныя его, и ослабеют: ³⁷ мечь на кони его и на колесницы его, и на вся прочыя люди, иже суть посреде его, и будут яко жены: мечь на сокровища его, и расхитятся: ³⁸ мечь на воды его, и постыдятся, яко земля изваянных есть, и во островех хваляхуся. ³⁹ Сего ради поживут мечты во островех, и поживут в нем дщери сиринов, и не будет живуща в нем ктому во веки, ниже соградится от рода в род. ⁴⁰ Якоже преврати Господь содома и гоморра и окрестныя грады их, глаголет Господь, не пребудет тамо муж, ниже поживет в нем сын человечь. ⁴¹ Се, людие идут от севера, и язык велик, и царие мнози востанут от конец земли, ⁴² луки и щиты имуще, грозни суть и немилостиви: глас их яко море возшумит, на кони возсядут, уготовани якоже огнь на брань противу тебе, дщи вавилоня. ⁴³ Услыша царь вавилонский слух их, и ослабеша руце его, скорбь объят его и болезни, яко раждающую. ⁴⁴ Се, яко лев изыдет от рыкания иорданова на место ефана, яко скоро отмщу их от него, и всякаго юношу над ним поставлю. Кто бо подобен мне? и кто может стояти противу мене? и кто есть пастырь сей, иже воспротивится лицу моему? ⁴⁵ Темже слышите совет Господень, егоже совеща на вавилон, и умышления его, яже умысли на землю халдейску: аще не исторгнутся агнцы овец их, аще не будет разметана (вкупе с ними) пажить их. ⁴⁶ От гласа бо пленения вавилонскаго потрясется земля, и вопль во языцех слышан будет.