¹ О моаве тако рече Господь вседержитель, Бог израилев: о, люте нававу, яко погибе, взяся кариафаим, посрамися масигаф и побежден есть. ² Несть ктому целение в моаве, веселие во есевоне, помыслиша нань злая: приидите и потребим я от язык: (сего ради) молчя умолкнеши, пойдет за тобою мечь. ³ Глас вопля от оронаима, погубление и сотрение велико. ⁴ Сотреся моав, возвестите вопль малых его. ⁵ Яко исполнися алаоф плача: взыдет рыдая путем оронаима, врази, вопль сотрения слышасте. ⁶ Бежите и спасите душы вашя, и будете яко осел дивий в пустыни. ⁷ Понеже имел еси надежду во оградах твоих и в сокровищих твоих, и ты ят будеши: и пойдет хамос во преселение, и священницы его и князи его вкупе. ⁸ И приидет губитель на всяк град, и не избавится ни един град, и погибнут удолия, и погубятся поля, якоже рече Господь. ⁹ Дайте знамение моаву, яко прикосновением прикосновен будет, и вси гради его будут пусти и без живущих. ¹⁰ Проклят (человек) творяй дело Господне с небрежением, и проклят возбраняяй мечу своему от крове. ¹¹ Почиваше моав от младости своея и бе уповая на славу свою: не прелияся от сосуда в сосуд и во преселение не отиде: сего ради пребысть вкус его в нем, и воня его несть пременена. ¹² Сего ради, се, дние грядут, глаголет Господь, и послю ему преселители, и преселят его, и сосуды его истощат и роги его сокрушат: ¹³ и посрамится моав от хамоса, якоже посрамлен есть дом израилев от вефиля, в немже имяху надежду. ¹⁴ Како глаголете: сильни есмы и мужие крепцы во бранех? ¹⁵ Погибе моав, град его, и избраннии юноши его снидоша под мечь, глаголет Царь, Господь вседержитель имя его. ¹⁶ Близ день моавль, еже приити, и зло его скоро зело. ¹⁷ Утешайте его вси, иже окрест его, и вси ведящии имя его: рцыте, како сокрушися жезл крепости, палица славна? ¹⁸ Сниди от славы и сяди, во влаге живущая, дщи дивоня, яко губитель моавский взыдет на тя разрушаяй ограды твоя. ¹⁹ На пути стани и воззри, живущая во ароире, и вопроси бежащаго и избегшаго, и рцы: что се бысть? ²⁰ Посрамися моав, зане побежден есть: рыдайте и вопийте, возвестите во арноне, яко погибе моав, ²¹ и суд прииде на землю напольную, на хелон и на рефас и на мофаф, ²² и на девон и на наво и на дом девлафаим, ²³ и на кариафаим и на вефгамул и на дом маонов, ²⁴ и на кариоф и на восора и на вся грады моавли, иже далече и иже близ суть. ²⁵ Отсечен есть рог моавль, и мышца его сокрушися, глаголет Господь: ²⁶ упойте его, яко на Господа возвеличися, и приразит моав руку свою (о блевотину), и будет в посмех и сам. ²⁷ И аще не в посмех бысть тебе израиль, аще в татстве твоем обретеся, яко воевал еси его: преселишися инамо. ²⁸ Оставите грады и пребывайте на камени, живущии в моаве, и будите якоже голуби гнездящиися в каменех, во устех скважни. ²⁹ Слышахом гордость моавлю, горд бе зело: презорство его и кичение его, возношение и воздвижение сердца его. ³⁰ Аз же вем дела его, глаголет Господь: не доволство ли его тако сотвори? ³¹ Сего ради над моавом возрыдайте всюду, возопийте над мужи кирады смущения. ³² Яко плачем иазировым восплачуся о тебе, винограде асеримль! леторасли твоя проидоша море, градов иазировых коснушася, на жатву твою и на винное собирание твое хищник нападе. ³³ Отята есть радость и веселие от кармила и от земли моавли, и вино от точил отях: никакоже изгнетаяй винну ягоду по обычаю песни воспоет. ³⁴ От вопля есевонска даже до елеала и иаса грады их даша глас свой, от сигора даже до оронаима, и юница трилетная, понеже и воды немрим во сожжение будут. ³⁵ И отиму моава, глаголет Господь, жрущаго на горах и кадящаго богом своим. ³⁶ Того ради сердце моава, яко цевницы звяцати будут, и сердце мое к мужем кирады яко цевница звяцати будет: сего ради, яже пристяжа, погибоша от человек. ³⁷ Всяка бо глава на всяцем месте острижена будет, и всяка брада оброснется, и всяка рука посечена будет, и на всяцем чресле вретище, ³⁸ и на всех храминах моавских и на стогнах его всяк плачь, понеже сокруших моава, якоже сосуд непотребен, глаголет Господь. ³⁹ Како изменися? возрыдаша, како обрати хребет моав и посрамися? и бысть моав в посмех и в ненависть всем окрест себе. ⁴⁰ Яко тако глаголет Господь: се, якоже орел полетит и распрострет криле свои на моава, ⁴¹ взят есть кариоф, и ограды его обстоимы суть: и будет сердце сильных моавских в той день, яко сердце жены родящия. ⁴² И погибнет моав от людий, яко на Господа возвеличися. ⁴³ Страх и пропасть и сеть на тя, о, живущий в моаве, глаголет Господь. ⁴⁴ Иже убежит от лица страха, впадет в пропасть: и излазяй из пропасти имется сетию: понеже наведу сия на моава в лето посещения их, глаголет Господь. ⁴⁵ Во стени есевонстей сташа от силы избегше, огнь бо изыде от есевона и пламень от среды сеона, и пожже часть моава и верх сынов смятения. ⁴⁶ Горе тебе, моаве! погибоша людие хамоса, яко отведошася сынове твои и дщери твоя в плен. ⁴⁷ И возвращу плен моавль в последния дни, глаголет Господь. До зде суд моавль.