¹ И приидоша вси воеводы силы, и иоанан сын кариев и азариа сын маасеев, и вси людие от мала и до велика ² ко иеремии пророку и рекоша ему: да падет молитва наша пред лицем твоим, и помолися о нас ко Господеви Богу твоему о оставшихся сих: яко остася мало нас от многих, якоже очи твои видят: ³ и да возвестит нам Господь Бог твой путь, по немуже пойдем, и слово, еже сотворим. ⁴ И рече им иеремиа пророк: слышах: се, аз помолюся о вас Господеви Богу нашему по словесем вашым: и будет, слово, еже отвещает Господь, повем вам и не потаю от вас словесе. ⁵ Тии же рекоша иеремии: буди Господь в нас послух правдив и верен, яко по всему слову, еже аще послет Господь к нам, тако сотворим: ⁶ аще добро и аще зло, гласа Господа нашего, к немуже мы посылаем тя, послушаем, да лучше нам будет, яко послушаем гласа Господа Бога нашего. ⁷ И егда скончашася десять дний, бысть слово Господне ко иеремии. ⁸ И призва иоанана сына кариева и воеводы силы, иже с ним быша, и вся люди от мала и до велика, ⁹ и рече им: тако рече Господь Бог израилев, к немуже посыласте мя, да простру молитвы вашя пред ним: ¹⁰ аще седяще сядете на земли сей, то созижду вас, а не разорю, и насажду вас, а не исторгну, яко престах от зол, яже сотворих вам. ¹¹ Не убойтеся от лица царя вавилонска, егоже вы боитеся: от лица его не убойтеся, рече Господь: яко аз с вами есмь, еже избавляти вас и спасати вас от руки его: ¹² и дам вам милость и помилую вас и возвращу вас на землю вашу. ¹³ Аще же речете вы: не сядем на земли сей, еже не слышати гласа Господа Бога нашего, ¹⁴ глаголюще: никако, но в землю египетску внидем, и не узрим рати, и гласа трубнаго не услышим, и о хлебех не взалчем, и тамо вселимся: ¹⁵ того ради слышите слово Господне, оставшии иудины, тако рече Господь вседержитель, Бог израилев: аще вы дадите лице ваше во египет и внидете тамо жити, ¹⁶ и будет, мечь, егоже вы боитеся от лица его, обрящет вы во египте, и глад, от негоже вы опасение имате от лица его, постигнет вы вслед вас во египте, и тамо измрете вы. ¹⁷ И будут вси мужие и вси иноплеменницы положившии лице свое на землю египетску жити тамо, оскудеют гладом и мечем, и будет от них ни един спасаемь от зол, яже аз наведу на ня. ¹⁸ Яко тако рече Господь сил, Бог израилев: якоже вскапа ярость моя на живущыя во Иерусалиме, тако вскаплет ярость моя на вас, вшедшым вам во египет: и будете в непроходимая и подручни, и в клятву и во укоризну, и не узрите ктому места сего. ¹⁹ Сия глагола Господь на вас оставшихся от иуды: не входите во египет. И ныне ведяще уведаете, яко засвидетелствовах вам днесь: ²⁰ яко слукавновасте в душах ваших, пославше мя ко Господу Богу вашему, глаголюще: помолися о нас Господеви: и по всему, елико возглаголет тебе Господь Бог наш, тако возвести нам, и сотворим. ²¹ И возвестих вам днесь, и не послушасте гласа Господа Бога вашего во всем, егоже посла к вам: ²² и ныне ведуще ведайте, яко мечем и гладом и мором изчезнете на месте, на неже хощете ити жити тамо.