¹ И слыша сафаниа сын нафань и годолиа сын пасхоров, и иоахал сын селемиин и фасхор сын мелхиев словеса, яже иеремиа глагола ко всем людем, глаголя: ² тако рече Господь: седяй во граде сем умрет мечем и гладом и мором, исходяй же ко халдеем жив будет, и будет душа его на обретение, и жив будет. ³ Яко тако рече Господь: преданием предастся град сей в руце силы царя вавилонска, и возмет его. ⁴ И рекоша царю: да умрет человек той, яко сей разслабляет руце мужей воюющих оставшихся во граде и руки всех людий, глаголя к ним по словесем сим: яко человек сей не проповедает людем сим мира, но токмо злая. ⁵ И рече царь седекиа: се, той в руках ваших. Понеже не можаше царь противу им. ⁶ И взяша иеремию и ввергоша его в ров мелхиин, сына царева, иже бяше во дворе темничнем: и свесиша его ужами в ров, в рове же не бяше воды, но тина, и бяше в тине иеремиа. ⁷ И слыша авдемелех мурин, и той бяше во дворе цареве, яко ввергоша иеремию в ров: царь же (в той час) седяше во вратех вениаминих. ⁸ И изыде авдемелех от дому царева и рече ко царю глаголя: ⁹ злосотворил еси, яже сотворил еси, убивая человека сего от лица глада, яко несть хлеба во граде ктому. ¹⁰ И повеле царь авдемелеху, глаголя: поими с собою отсюду тридесять мужей и извлецы иеремию из рова, да не умрет. ¹¹ И поят авдемелех мужы, и прииде в дом царев подземный, и взя оттуду ветхи порты и ветхия ужы, и вверже я ко иеремии в ров, и рече к нему: ¹² положи сия под ужы. И сотвори иеремиа сице. ¹³ И извлекоша его ужами и изяша его из рова. И седе иеремиа во дворе темничнем. ¹⁴ И посла царь, и призва к себе иеремию в дом аселисиль, иже в дому Господни. И рече ему царь: вопрошаю тя словесе (единаго), и не утай от мене словесе. ¹⁵ И рече иеремиа царю: аще повем ти, то не смертию ли умориши мя? и аще совещаю ти, то не послушаеши мене. ¹⁶ И клятся ему царь, глаголя: жив Господь, иже сотвори нам душу сию, аще убию тя и аще предам тя в руце человек сих ищущих души твоея (на смерть). ¹⁷ И рече ему иеремиа: тако рече Господь сил, Бог израилев: аще изыдый изыдеши к воеводам царя вавилонска, жива будет душа твоя, и град сей не пожжется огнем, и жив будеши ты и дом твой: ¹⁸ аще же не изыдеши ко князем царя вавилонска, предастся град сей в руце халдейсте, и пожгут его огнем, и ты не спасешися от руки их. ¹⁹ И рече царь иеремии: аз опасение имам от иудеев избежавших ко халдеем, да не предадут мя (халдее) в руце их, и поругаются ми. ²⁰ И рече иеремиа: не предадят тебе: послушай убо словесе Господня, еже аз глаголю тебе, и лучше ти будет, и жива будет душа твоя: ²¹ и аще не восхощеши ты изыти, сие слово, еже сказа мне Господь: ²² и се, вся жены, оставшыяся в дому царя иудина, изведутся ко князем царя вавилонска: и тыя глаголаху: прельстиша тя и премогоша тя мужие мирницы твои, и ослабиша во поползновениих ногу твою и отвратишася от тебе: ²³ и жены твоя и чада твоя изведут ко халдеем, и ты не уцелееши, яко рукою царя вавилонска ят будеши, и град сей пожжется. ²⁴ И рече ему царь: человек да не увесть словес сих, и да не умреши ты. ²⁵ И аще услышат князи, яко глаголах с тобою, и приидут к тебе и рекут ти: повеждь нам, что глагола к тебе царь? не утай от нас, и не убием тебе: и что глагола к тебе царь? ²⁶ И речеши им: повергох аз моление мое пред лицем царевым, яко да не возвратит мене в дом ионафань, умрети ми тамо. ²⁷ И приидоша вси князи ко иеремии и вопросиша его. И поведа им по всем словесем сим, яже заповеда ему царь. И умолкнуша, яко несть слышано слово Господне. ²⁸ И седяше иеремиа во дворе темничнем, дондеже взяша Иерусалим.