¹ Слово, еже бысть ко иеремии от Господа, егда навуходоносор царь вавилонский и вси вои его, и вся земля власти его и вси людие воеваху на Иерусалим и на вся грады иудины, глаголя: ² тако рече Господь Бог израилев: иди ко седекии царю иудину и речеши ему: тако рече Господь: преданием предастся сей град в руце царя вавилонска, и возмет его и пожжет его огнем: ³ и ты не уцелееши от руку его, и ят будеши, и в руце его предасися: и очи твои очи его узрят, и уста его со усты твоими соглаголют, и в вавилон внидеши. ⁴ Но обаче слыши слово Господне, седекие, царю иудинъ! тако глаголет Господь к тебе: не умреши от меча, но в мире умреши: ⁵ и якоже плакаша отцев твоих царствовавших прежде тебе, восплачутся и тебе: увы, господи, и: увы, господи! восплачутся и тебе, яко слово аз соглаголах, рече Господь. ⁶ И глагола иеремиа пророк ко седекии царю иудину вся словеса сия во Иерусалиме. ⁷ И сила царя вавилонска воева на Иерусалим и на грады иудины оставшыяся: на лахис и на азику, яко тии осташася во градех иудиных грады тверды. ⁸ Слово бывшее ко иеремии от Господа, повнегда скончати царю седекии завет к людем, иже во Иерусалиме, еже нарещи им отпущение, ⁹ еже отпустити комуждо раба своего и комуждо рабыню свою, евреанина и евреаныню, свободны, да не работает муж от израиля. ¹⁰ И обратишася вси вельможи и вси людие вступившии в завет еже отпустити комуждо раба своего и комуждо рабу свою свободны и ктому не владети ими. Слышаша убо и отпустиша. ¹¹ И обратишася по сих вспять и удержаша паки рабы и рабыни своя, ихже отпустиша свободных, и взяша в рабы и рабыни. ¹² И бысть слово Господне ко иеремии от Господа глаголя: ¹³ тако рече Господь Бог израилев: аз завещах завет ко отцем вашым в день, в оньже избавих я от земли египетския, из дому работы, глаголя: ¹⁴ егда скончаются шесть лет, да отпустиши брата своего евреанина, иже продан есть тебе: и да делает ти шесть лет, и да отпустиши его свободна от себе. И не послушаша мене отцы ваши, ни приклониша уха своего. ¹⁵ И обратистеся вы днесь сотворити правая пред очима моима, еже нарещи комуждо отпущение ближняго своего: и совершисте завет пред лицем моим в дому, идеже наречеся имя мое в нем: ¹⁶ и отвратистеся, и осквернисте завет мой, еже возвратити комуждо раба своего и комуждо рабу свою, ихже отпустисте свободны душею их: и покористе их, якоже быти у вас в рабы и в рабыни. ¹⁷ Того ради сице рече Господь: вы не послушасте мене, нарещи отпущения кийждо брату своему и кийждо ближнему своему: се, аз нарицаю отпущение вам на мечь и на смерть и на глад, и дам вы на разсыпание всем царствам земным: ¹⁸ и дам мужы преступившыя завет мой и не хранящыя словес завета моего, емуже соизволиша пред лицем моим: телца егоже разсекоша на две части и ходиша между разделенными частьми его: ¹⁹ князи иудины и князи Иерусалимли, и вельможы и жерцы и вся люди земли ходящыя между разделеным телцем, ²⁰ и дам я в руки врагом их и в руки ищущих души их, и будут трупи их в ядь птицам небесным и зверем земным: ²¹ и седекию царя иудейска и князи его дам в руце врагов их и в руку ищущих души их и в руку воинства царя вавилонска, отбегающих от них. ²² Се, аз завещаю, рече Господь, и возвращу я в землю сию, и повоюют на ню, и возмут ю, и пожгут ю огнем и грады иудины: и дам я в непроходны от живущих.