¹ Слово бывшее от Господа ко иеремии в десятое лето седекии, царя иудина, то лето осмоенадесять навуходоносору царю вавилонску. ² И тогда сила царя вавилонска острог обложи окрест Иерусалима, иеремиа же стегомь бяше во дворе темничнем, иже есть во дворе царя иудина, ³ в нейже заключи его седекиа царь, глаголя: почто ты прорицаеши, глаголя: тако рече Господь: се, аз даю сей град в руце царя вавилонска, и возмет его, ⁴ и седекиа царь иудин не спасется от руки халдейски, яко преданием предастся в руце царя вавилонска, и соглаголет усты своими ко устом его, и очи его очи его узрят, ⁵ и в вавилон внидет седекиа и ту будет, дондеже посещу его, глаголет Господь: аще же воевати будете на халдеи, ничесоже успеете? ⁶ И рече иеремиа: бысть слово Господне ко мне глаголя: ⁷ се, аиамеил, сын саломль, брата отца твоего, идет к тебе, глаголя: прикупи себе село мое, еже во анафофе, яко тебе суд ужичества прияти во притяжание. ⁸ И прииде ко мне анамеил, сын саломль, брата отца моего, по словеси Господню во двор темничный и рече ми: прикупи себе село мое, еже во анафофе в земли венмаиини: яко тебе суд прикупити е, ты бо старей. И разумех, яко слово Господне есть, ⁹ и прикупих село анамеиле, сына брата отца моего, от анафофа, и поставих ему седмьнадесять сикль сребра, ¹⁰ и вписах в книгу и запечатах, и засвидетелствовах послухи и поставих сребро на весах. ¹¹ И взях книгу купления прочтену и запечатану. ¹² И дах книгу купления варухови сыну нириину, сына маассеова, пред очима анамеила сына брата отца моего, и пред очима стоящих послух и вписавших в книги купления, и пред очима всех иудеов, седящих во дворе темничнем. ¹³ И завещах варуху пред очима их, глаголя: ¹⁴ тако рече Господь вседержитель Бог израилев: возми книгу сию купления запечатленну и книгу прочтеную и вложи ю в сосуд глинян, да пребудет дни множайшыя. ¹⁵ Яко тако рече Господь вседержитель Бог израилев: еще притяжутся храмины и села и винограды на сей земли. ¹⁶ И молихся ко Господеви по отдании книги прикупления варуху сыну нириину, глаголя: ¹⁷ о, сый Господи Боже! ты сотворил еси небо и землю крепостию твоею великою и мышцею твоею высокою, не утаится от тебе ничтоже, ¹⁸ творяй милость в тысящы и отдаяй грехи отчи в недра чад их по них: Бог великий и крепкий, ¹⁹ Бог велика совета и силен делесы, Бог великий вседержитель и великоименит Господь: очи твои отверсты на вся пути сынов человеческих, дати комуждо по пути его и по плоду начинаний его: ²⁰ иже сотворил еси знамения и чудеса во земли египетстей, даже до сего дне и во израили и в людех, и сотворил еси имя себе, якоже день сей, ²¹ и извел еси люди твоя израиля из земли египетския знамении и чудесы, рукою крепкою и мышцею высокою и видении великими, ²² и дал еси им сию землю, еюже клялся еси отцем их, землю кипящую медом и млеком. ²³ И внидоша и прияша ю, и не послушаша гласа твоего и в заповедех твоих не ходиша: вся, яже заповедал еси им (творити), не сотвориша, и сотвориша, да сбудутся им вся злая сия. ²⁴ Се, народ идет на сей град взяти его, и град предан есть в руце халдеев воюющих нань от лица меча и глада и мора. Якоже глаголал еси, тако и бысть: и се, ты зриши. ²⁵ А ты ко мне глаголеши: притяжи себе село сребром: и вписах в книгу, и запечатах, и засвидетелствовах послухи, град же предастся в руце халдейсте. ²⁶ И бысть слово Господне ко мне глаголя: ²⁷ аз Господь Бог всея плоти, еда от мене утаится что? ²⁸ Сего ради тако рече Господь Бог израилев: отдан предастся сей град в руце царя вавилонска, и возмет его, ²⁹ и приидут халдее воюющии на сей град, и пожгут его огнем, и храмины сожгут, в нихже кадиша на кровех своих ваалу и возливаша возлияния богом инем, ко еже разгневати мя. ³⁰ Понеже беша сынове израилевы и сынове иудины едини творяще зло пред очима моима от юности своея, сынове израилевы подвизают мя на гнев в делех рук своих, рече Господь. ³¹ Яко на гнев мой и на ярость мою бе град сей, от негоже дне соградиша его и даже до сего дне, яко отставити его от лица моего, ³² злобы ради всякия сынов израилевых и иудиных, яко сотвориша разгневати мя тии и царие их, и князи их и вельможи их, и жерцы их и пророцы их, мужие иудины и живущии во Иерусалиме, ³³ и обратиша хребет ко мне, а не лице: и наказах я из утра, и не послушаша прияти наказания, ³⁴ и положиша осквернения своя в дому, идеже наречеся имя мое, в нечистотах своих: ³⁵ и соградиша требища ваалу, яже в дебри сына енномля, еже возносити сыны своя и дщери своя молоху, ихже не заповедах им, и не взыде на сердце мое, еже сотворити мерзость сию на согрешение иуде. ³⁶ И ныне тако рече Господь Бог израилев ко граду, о немже ты глаголеши: предан будет в руце царя вавилонска мечем и гладом и мором. ³⁷ Се, аз соберу я от всея земли, идеже разсеях я во гневе моем и ярости моей и в преогорчении велием, и обращу я на сие место, и посажду я во уповании, ³⁸ и будут ми в люди, и аз буду им в Бога: ³⁹ и дам им путь ин и сердце ино, боятися мене вся дни, на благоту им и чадом их по них: ⁴⁰ и завещаю им завет вечный, егоже не отвращу последи их, и страх мой дам в сердце их, ко еже не отступити им от мене: ⁴¹ и посещу еже ублажити я и насажду я в сей земли с верою и со всем сердцем моим и со всею душею моею. ⁴² Яко тако рече Господь: якоже наведох на люди сия вся злая сия великая, тако аз наведу на них вся благоты, яже аз глаголах к ним. ⁴³ И возобладают паки селы на земли, о нейже ты глаголеши: непроходна будет от человек и скота, и предашася в руце халдейсте. ⁴⁴ И притяжут села сребром: и впишеши в книги, и запечатаеши, и опослушиши послухи в земли вениамини и окрест Иерусалима, и во градех иудиных и во градех горних, и во градех польных и во градех нагев и: яко возвращу преселения их, глаголет Господь.