¹ Во время оно рече Господь, буду в Бога роду израилеву, и тии будут ми в люди. ² Тако рече Господь: обретох теплоту в пустыни со изгибшими от меча: идите и не потребите израиля, ³ Господь издалеча явится ему: любовию вечною возлюбих тя, того ради вовлекох тя в щедроты. ⁴ Яко возгражду тя, и возградишися, дево израилева: возмеши тимпаны своя и изыдеши с собором играющих. ⁵ Еще насадите винограды в горе самарийстей, насаждающе насадите и похвалите. ⁶ Яко есть день воззвания отвещавающих в горах ефремовых: востаните и взыдите в сион ко Господеви Богу нашему: ⁷ яко тако рече Господь иакову: возвеселитеся веселием и воскликните на главу языков: слышано сотворите и похвалите, рцыте: спасе Господь люди своя, останок израилев. ⁸ Се, аз веду их от севера и соберу их от конец земли в праздник пасхи: и чадородит народ мног, и возвратятся семо. ⁹ С плачем изыдоша, а со утешением возведу я, проводя чрез ровенники вод по пути праву, и не заблудят по нему: яко аз бех израилеви во Отца, и ефрем первенец ми есть. ¹⁰ Слышите, языцы, слово Господне, и возвестите во островех дальних и рцыте: развеявый израиля соберет его и снабдит его, яко пастырь стадо свое. ¹¹ Яко избави Господь иакова и изят его от руки сильнейших его. ¹² И приидут и возвеселятся в горе сион, и приидут ко благотам Господним, на землю пшеницы и вина и плодов, и скотов и овнов: и будет душа их якоже древо плодовито, и не взалчут ктому. ¹³ Тогда возрадуются девицы в собрании юношей, и старцы возрадуются: и обращу плачь их на радость, и утешу их, и сотворю их веселы. ¹⁴ Возвеличу и упою душу жерцев сынов левииных, и людие мои благот моих насытятся. ¹⁵ Тако рече Господь: глас в раме слышан бысть плача и рыдания и вопля: рахиль плачущися чад своих, и не хотяше утешитися, яко не суть. ¹⁶ Тако рече Господь: да почиет глас твой от плача и очи твои от слез, яко есть мзда делом твоим, глаголет Господь, и возвратятся от земли вражия: ¹⁷ и есть надежда последним твоим, (глаголет Господь,) и возвратятся сынове твои в пределы своя. ¹⁸ Слышя слышах ефрема плачуща: наказал мя еси, (Господи,) и наказахся: аз якоже телец не научихся: обрати мя, и обращуся, яко ты еси Господь Бог мой: ¹⁹ понеже последи пленения моего покаяхся и последи разумения моего возстенах в день посрамления и показах тебе, яко приях укоризну от юности моея. ²⁰ Сын любезен мне, ефрем, отроча питеющееся, понеже словеса моя в нем, памятию воспомяну и: того ради потщахся о нем, милуяй помилую его, рече Господь. ²¹ Постави себе самого, сионе, стражу, сотвори мучение, направи сердце твое на путь прав, имже ходил еси: возвратися, девице израилева, обратися во грады твоя рыдающи. ²² Доколе отвращаешися, дщи обезчествованая? яко созда Господь спасение в насаждение ново, в немже спасении обыдут человецы. ²³ Яко тако рече Господь: еще рекут слово сие в земли иудейстей и во градех ея, егда возвращу преселение его: благословен Господь на праведней горе святей своей: ²⁴ и живущии во градех иудиных и во всей земли его, купно со земледельцем, и вознесется во стаде. ²⁵ Яко упоих всяку душу жаждущу и всяку душу алчущу насытих. ²⁶ Того ради востах от сна и видех, и сон ми сладок бысть. ²⁷ Се, дние грядут, глаголет Господь, и всею израиля и иуду семя человечо и семя скотское. ²⁸ И будет, якоже бдех на ня потребити и озлобити, тако бдети буду о них, еже созидати и насаждати, рече Господь. ²⁹ В тыя дни не рекут ктому: отцы ядоша кислая, а зубы детем оскомнишася: ³⁰ но кийждо своим грехом умрет, и ядшему кислая оскоменятся зубы его. ³¹ Се, дние грядут, глаголет Господь, и завещаю дому израилеву и дому иудину завет нов, ³² не по завету, егоже завещах отцем их в день, в оньже емшу ми за руку их, извести я от земли египетския, яко тии не пребыша в завете моем, и аз небрегох их, глаголет Господь. ³³ Яко сей завет, егоже завещаю дому израилеву по днех онех, глаголет Господь: дая законы моя в мысли их, и на сердцах их напишу я, и буду им в Бога, и тии будут ми в люди: ³⁴ и не научит кийждо ближняго своего и кийждо брата своего, глаголя: познай Господа: яко вси познают мя от мала даже и до великаго их: яко милостив буду неправдам их и грехов их не помяну ктому. ³⁵ Аще возиесется небо на высоту, рече Господь, и аще смирится испод земли низу, и аз не отвергу рода израилева о всех, яже сотвориша, глаголет Господь. ³⁶ Тако рече Господь, давый солнце во свет дне, луну и звезды на свет нощи, и вопль на мори, и возшумеша волны его, Господь вседержитель имя ему. ³⁷ Аще премолкнут законы сии от лица моего, рече Господь, то и род израилев престанет быти язык пред лицем моим во вся дни. ³⁸ Се, дние грядут, рече Господь, и созиждется град Господеви от столпа анамеиля до врат уголных: ³⁹ и изыдет размерение его противу ему до могил гарив, и оымется окрест избранным камением, ⁴⁰ и всю юдоль мертвых и пепела, и весь ассаримоф даже до водотечи кедрския, даже до угла коний врат восточных, освящение Господеви, и ктому не исторгнется и не потребится даже до века.