¹ Слово бывшее ко иеремии от Господа глаголя: ² тако рече Господь Бог израилев глаголя: впиши вся словеса в книги, яже глаголах к тебе. ³ Яко се, дние грядут, рече Господь, и возвращу преселение людий моих израиля и иуды, рече Господь вседержитель, и возвращу я на землю, юже дах отцем их, и овладеют ею. ⁴ И сия словеса, яже глагола Господь о израили и о иуде. ⁵ Тако рече Господь: глас страха услышите: страх, и несть мира. ⁶ Вопросите и видите, аще раждает мужеск пол? и о страсе, в немже имети будут чресла и спасение? понеже видех всякаго человека, и руце его на чреслех его аки раждающия: обратишася лица в желтую болезнь. ⁷ о, люте! яко бысть велик день той и несть подобна ему: и время тесно есть иакову, и от того спасется. ⁸ В той день, рече Господь, сокрушу ярем со выи их и узы их расторгну: и не послужат тии ктому чуждим, ⁹ но послужат тии Господу Богу своему: и давида царя их возставлю им. ¹⁰ Сего ради ты не бойся, рабе мой иакове, глаголет Господь, ни устрашайся, израилю: яко се, аз спасу тя из земли дальния и семя твое из земли пленения их: и возвратится паки иаков и почиет и всякаго добра исполнен будет, и не будет устрашаяй тя. ¹¹ Яко аз с тобою есмь, глаголет Господь, спасаяй тя: яко сотворю скончание во всех языцех, в няже разсеях тя: тебе же не сотворю во скончание, но накажу тя в суде и очищая не очищу тя. ¹² Тако бо глаголет Господь: возставих сокрушение твое, болезненна есть язва твоя, ¹³ несть судяй суда твоего, на болезнь врачевался еси, пользы несть тебе: ¹⁴ вси друзие твои забыша тя, ниже вопросят тя, яже о мире твоем: яко язвою вражиею поразих тя, наказанием твердым: множества ради неправды твоея превозмогоша греси твои. ¹⁵ Что вопиеши о сокрушении твоем? неизцельна есть болезнь твоя множества ради неправды твоея, и твердых ради грехов твоих сотворих ти сия (вся). ¹⁶ Того ради вси ядущии тя изядени будут, и вси врази твои плоть их всю изядят: во множестве неправды твоея умножишася греси твои, сотвориша сия тебе: и будут разграбляющии тя в разграбление, и всех пленяющих тя дам во пленение. ¹⁷ Яко обяжу язву твою и от ран твоих уврачую тя, рече Господь: яко расточенным называху тя, сионе ловитва наша есть, яко несть взыскающаго его. ¹⁸ Тако глаголет Господь: се, аз возвращу преселение иаковле и пленники его помилую, и возградится град в высоту свою, и храм по чину своему утвердится: ¹⁹ и изыдут из него поющии и глас играющих, и умножу я, и не умалятся. ²⁰ И внидут сынове их якоже и прежде, и свидения их пред лицем моим исправятся: и посещу на вся стужающыя им, ²¹ и будут крепльшии его на ня, и князь его из него изыдет: и соберу я, и обратятся ко мне: кто бо есть той, иже приложит сердце свое обратитися ко мне? рече Господь. ²² И будете ми в люди, и аз вам буду в Бога. ²³ Яко гнев Господень изыде яр, изыде гнев обращаемь, на нечестивыя приидет. ²⁴ Не отвратится гнев ярости Господни, дондеже сотворит и дондеже исполнит умышление сердца своего: в последния дни познаете я.