¹ Сия рече Господь: иди и вниди в дом царя иудина и рцы тамо слово сие, ² и речеши: слыши слово Господне, царю иудин, иже седиши на престоле давидове, ты и дом твой, и раби твои и людие твои и входящии дверьми сими: ³ сия глаголет Господь: творите суд и правду, и избавите силою угнетена от руку обидящаго и, и пришелца и сира и вдовицы не оскорбляйте, не угнетайте беззаконно, и крове неповинныя не изливайте на месте сем. ⁴ Аще бо творяще сотворите слово сие, то внидут вратами дому сего царие седящии на престоле давидове и вседающии на колесницы и на кони, тии и раби их и людие их. ⁵ Аще же не послушаете словес сих, сам собою закляхся, рече Господь, яко в пустыню будет дом сей. ⁶ Понеже тако глаголет Господь на дом царя иудина: галаад ты мне, глава ливанская, аще не поставлю тебе в пустыню, во грады необитанны, ⁷ и наведу на тя убивающа мужа и секиру его, и посекут избранныя кедры твоя и вергут на огнь. ⁸ И пройдут языцы мнози сквозе град сей, и речет кийждо искреннему своему: вскую сотвори Господь тако граду сему великому? ⁹ И отвещают: сего ради, яко оставиша завет Господа Бога своего и поклонишася богом чуждим и послужиша им. ¹⁰ Не плачите мертваго, ниже рыдайте о нем: плачите плачем о исходящем, яко не возвратится ктому, ниже увидит земли рождения своего. ¹¹ Понеже сия рече Господь к селлиму сыну иосиину царю иудину царствующему вместо иосии отца своего, иже изшел есть от места сего: не возвратится ктому семо, ¹² но на месте том, аможе преведох его, тамо умрет и земли сея не узрит ктому. ¹³ Горе созидающему дом свой с неправдою и горницы своя не в суде, у негоже ближний его делает туне, и мзды его не воздаст ему: ¹⁴ иже рече: созижду себе дом пространен, и горницы широки со отверстыми окнами и своды кедровыми, и расписаны червленцем. ¹⁵ Еда царствовати будеши, яко ты поощряешися о ахазе отце твоем? не ядят, ниже пиют: лучше тебе было творити суд и правду благу. ¹⁶ Не познаша, не судиша суда смиренных, ниже суда нища: не сие ли тебе есть, еже не знати тебе мене, рече Господь? ¹⁷ Се, не суть очи твои, ниже сердце твое благо, но к сребролюбию твоему и крове неповинныя пролиянию, и ко обидам и ко убийству, еже творити я. ¹⁸ Сего ради сия рече Господь ко иоакиму сыну иосиину царю иудину: горе мужу сему, не оплачут его: горе, брате! ниже возрыдают о нем: увы мне, господине! ¹⁹ Погребением ослим погребется, влачимь извержен будет вне врат Иерусалима. ²⁰ Взыди на ливан и возопий, и в васан даждь глас твой, и возопий на он пол моря, яко сотрени суть вси любовнии твои. ²¹ глаголах к тебе в падении твоем, и рекл еси: не услышу. Сей путь твой от юности твоея, яко не послушал еси гласа моего. ²² Всех пастырей твоих упасет ветр, и любовнии твои во пленение пойдут, и тогда постыдишися и посрамишися от всех любящих тя: ²³ иже седиши в ливане и гнездишися в кедрех, возстенеши, егда приидут к тебе болезни, яко раждающия. ²⁴ Живу аз, рече Господь, аще будет иехониа сын иоакима царь иудин, перстень на руце десней моей, оттуду исторгну тя ²⁵ и предам тя в руки ищущих души твоея и в руки, ихже ты боишися лица, и в руки навуходоносора царя вавилонска и в руки халдеом, ²⁶ и отвергу тя и матерь твою, яже роди тя, в землю чужду, в нейже несте рождени, и тамо умрете: ²⁷ а в землю, в нюже тии желают душами своими возвратитися, не возвратятся. ²⁸ Обезчестися иехониа, аки сосуд непотребен, яко отриновен бысть той и семя его, и извержен в землю, еяже не ведяше. ²⁹ Земле, земле, земле, слыши слово Господне! ³⁰ Сия рече Господь: напиши мужа сего отвержена, мужа, иже во днех своих не предуспеет: ниже бо будет от семене его муж, иже сядет на престоле давидове, и власть имеяй ктому во иуде.