¹ И бысть слово Господне ко иеремии о бездождии. ² Рыдала иудеа, и врата ея разрушишася, и отемнишася на земли, и вопль Иерусалима взыде. ³ И вельможи его послаша менших своих к воде: приидоша на кладязи и не обретоша воды, и отнесоша сосуды своя тщы: постыждени суть и посрамлени, и покрыша главы своя. ⁴ И дела земли оскудеша, яко не бяше дождя на землю: постыждени суть земледелцы, покрыша главы своя. ⁵ И еленицы на ниве родиша и оставиша, яко не бе травы. ⁶ Онагри сташа на камениих, браша в себе ветр яко змиеве, оскудеша очи их, яко не бе травы. ⁷ Беззакония наша противусташа нам: Господи, сотвори нам ради имене твоего, яко мнози греси наши пред тобою, тебе согрешихом. ⁸ Ожидание израилево, Господи, спасителю наш во время скорби! вскую яко пришлец еси на земли и яко путник укланяющься во виталище? ⁹ Еда будеши якоже человек спяй, или аки муж не могий спасти? ты же в нас еси, Господи, и имя твое призвано бысть на нас, не забуди нас. ¹⁰ Сия глаголет Господь людем сим: возлюбиша подвизати нозе свои и не упокоишася, и Бог не благопоспеши в них, ныне воспомянет беззакония их и посетит грехи их. ¹¹ И рече Господь ко мне: не молися о людех сих во благо: ¹² егда поститися будут, не услышу прошения их, и аще принесут всесожжения и жертвы, не благоволю в них: яко мечем и гладом и мором аз скончаю их. ¹³ И рекох: сый Господи Боже, се, пророцы их прорицают и глаголют: не узрите меча, и глад не будет вам, но истину и мир дам на земли и на месте сем. ¹⁴ И рече Господь ко мне: лживо пророцы прорицают во имя мое, не послах их, ни заповедах им, ни глаголал есмь к ним: понеже видения лжива и гадания и волшебства и произволы сердца своего тии прорицают вам. ¹⁵ Сего ради сия глаголет Господь о пророцех, иже пророчествуют во имя мое ложная, и аз не послах их, иже глаголют: мечь и глад не будет на земли сей: смертию лютою умрут и гладом скончаются пророцы тии. ¹⁶ И людие, имже тии пророчествуют, будут извержени на путех Иерусалима от лица меча и глада, и не будет погребаяй их, и жены их и сынове их и дщери их, и излию на них злая их. ¹⁷ И речеши к ним слово сие: да изведут очи ваши слезы день и нощь, и да не престанут, яко сотрением великим сотрена (дева) дщерь людий моих и язвою злою зело. ¹⁸ Аще изыду на поле, и се, заклани мечем: и аще вниду во град, и се, истаявшии гладом: яко пророк и священник отидоша в землю, еяже не ведяху. ¹⁹ Еда отмещущь отвергл еси иуду, и от сиона отступи душа твоя? вскую поразил еси нас, и несть нам изцеления? ждахом мира, и не бяху благая: времене уврачевания, и се, боязнь. ²⁰ Познахом, Господи, грехи нашя, беззакония отец наших, яко согрешихом пред тобою. ²¹ Престани ради имене твоего, не погуби престола славы твоея: воспомяни, не разори завета твоего иже с нами. ²² Еда есть во изваянных языческих, иже дождит? или небеса могут дати влагу свою? не ты ли еси, Господи Боже наш? и пождем тебе, Господи, ты бо сотворил еси вся сия.