¹ Слышите слово Господне, еже глагола Господь на вас, доме израилев. ² Сия глаголет Господь: по путем языков не учитеся и от знамений небесных не страшитеся, яко их боятся языцы. ³ Понеже законы языков суетни суть: древо есть от леса изсеченое, дело тектонское и слияние: ⁴ сребром и златом украшена суть, и млатами и гвоздьми утвердиша я, да не движутся: ⁵ сребро изваяно есть, не глаголют, носими носятся, понеже ходити не возмогут: не убойтеся их, яко не сотворят зла, и блага несть в них. ⁶ Несть подобен тебе, Господи: велик еси ты и велико имя твое в крепости. ⁷ Кто не убоится тебе, о, Царю языковъ! твоя бо честь между всеми премудрыми языков, и во всех царствах их ни един есть подобен тебе. ⁸ Купно буии и безумнии суть, учение суетных их древо есть: ⁹ сребро извито от фарсиса приходит, злато от офаза, и рука златарей, дела вся художников: в синету и багряницу одеют их, дела умоделников вся сия. ¹⁰ Господь же Бог истинен есть, той Бог живый и Царь вечный, от гнева его подвигнется земля, и не стерпят языцы прещения его. ¹¹ Тако рцыте им: бози, иже небесе и земли не сотвориша, да погибнут от земли и от сих, иже под небесем суть. ¹² Господь сотворивый землю во крепости своей, устроивый вселенную в премудрости своей, и разумом своим простре небо. ¹³ Ко гласу своему дает множество вод на небеси: и возведе облаки от последних земли, блистания в дождь сотвори и изведе ветр от сокровищ своих. ¹⁴ Буй сотворися всяк человек от ума (своего), постыдеся всяк златоделник во изваяниих своих, яко ложная слия, несть духа в них: ¹⁵ суетна суть дела, смеху достойна, во время посещения своего погибнут. ¹⁶ Несть сицевая часть иакову, яко создавый вся той есть, и израиль жезл достояния его, Господь сил имя ему. ¹⁷ Собра отвне имение, обитающее во избранных, ¹⁸ понеже тако глаголет Господь: се, аз отвергу обитатели земли сея в скорби и смущу их, яко да обрящется язва твоя. ¹⁹ Горе во сокрушении твоем, болезненна язва твоя: аз же рех: воистинну сия болезнь моя (есть) и объят мя, жилище мое опусте, погибе: ²⁰ скиния моя опусте, погибе, и вся кожи моя растерзашася: сынов моих и овец моих несть, несть ктому места скинии моей, места кожам моим: ²¹ понеже обуяша пастырие и Господа не взыскаша, сего ради не уразуме все стадо и расточено бысть. ²² Глас слышания, се, грядет и трус велий от земли северныя, да положит грады иудины в запустение и во обитание змием. ²³ Вем, Господи, яко несть человеку путь его, ниже муж пойдет и исправит шествие свое. ²⁴ Накажи нас, Господи, обаче в суде, а не в ярости, да не умаленых нас сотвориши. ²⁵ Излий гнев твой на языки не знающыя тя и на племена, яже имене твоего не призваша, яко поядоша иакова и потребиша его и пажить его опустошиша.