¹ Кто сей пришедый от едома, червлены ризы его от восора, сей красен во утвари, зело с крепостию? Аз глаголю правду и суд спасения. ² Почто червлены ризы твоя и одежды твоя яко от истоптания точила? ³ Исполнен истоптания, и от язык несть мужа со мною: и попрах я яростию моею, и сотрох я яко персть, и сведох кровь их в землю и вся ризы моя омочих: ⁴ день бо воздаяния прииде на них, и лето избавления приспе: ⁵ и воззрех, и не бе помощника: и помыслих, и никтоже заступи: и избави я мышца моя, и ярость моя наста: ⁶ и попрах я гневом моим и сведох кровь их в землю. ⁷ Милость Господню помянух, добродетели Господни во всех, имиже нам воздает: Господь, судия благ дому израилеву, наводит нам по милости своей и по множеству правды своея. ⁸ И рече: не людие ли мои? чада, и не отвергнутся. И бысть им во спасение и всякия скорби их. ⁹ Не ходатай, ниже ангел, но сам Господь спасе их, зане любит их и щадит их: сам избави их и восприят их и вознесе их во вся дни века. ¹⁰ Тии же не покоришася и разгневаша духа святаго его, и обратися им на вражду, и той воева на ня. ¹¹ И помяну дни вечныя: где возведый от земли пастыря овец своих? где есть вложивый в них духа святаго? ¹² Возведшая десницею моисеа, мышца славы его раздели воду пред лицем его сотворити ему имя вечно, ¹³ проведе их сквозе бездну, якоже коня сквозе пустыню, и не утрудишася, ¹⁴ и яко скоты по полю, и сниде дух от Господа и настави их: тако провел еси люди твоя сотворити тебе самому имя славно. ¹⁵ Обратися, Господи, от небесе и виждь от дому святаго твоего и славы твоея: где есть ревность твоя и крепость твоя? где есть множество милости твоея и щедрот твоих, яко терпел еси нам? ¹⁶ Ты бо еси Отец наш, понеже авраам не уведе нас, и израиль не позна нас, но ты, Господи, Отец наш, избави ны, исперва имя твое на нас есть. ¹⁷ Что уклонил еси нас, Господи, от пути твоего? и ожесточил еси сердца наша, еже не боятися тебе? Обратися ради раб твоих, ради племен достояния твоего, ¹⁸ да (поне) мало наследим горы святыя твоея. Противницы наши попраша святыню твою: ¹⁹ быхом яко исперва, егда не владел еси нами, ниже бе наречено имя твое на нас.