¹ Сиона ради не умолчу и Иерусалима ради не попущу, дондеже изыдет яко свет правда моя, и спасение мое яко светило разжжется. ² И узрят языцы правду твою, и царие славу твою, и прозовут тя именем новым, имже Господь наименует е. ³ И будеши венец доброты в руце Господни и диадима царствия в руце Бога твоего: ⁴ и не прозовешися ктому оставлен, и земля твоя ктому не наречется пуста: тебе бо прозовется воля моя, и земля твоя вселенная, яко благоволи Господь в тебе, и земля твоя вкупе населится. ⁵ И якоже живяй юноша с девою, тако поживут сынове твои с тобою: и будет якоже радуется жених о невесте, тако возрадуется Господь о тебе. ⁶ И на стенах твоих, Иерусалиме, приставих стражы весь день и всю нощь, иже до конца не премолкнут поминающе Господа. ⁷ Несть бо вам подобен: аще исправиши и сотвориши, Иерусалиме, радование на земли. ⁸ Клятся Господь десницею своею и крепостию мышцы своея: аще ктому отдам пшеницу твою и пищу твою врагом твоим, и аще ктому испиют вино твое сынове чуждии, о немже трудился еси: ⁹ но собирающии снедят я и похвалят Господа, и оымающии испиют я во дворех святых моих. ¹⁰ Идите враты моими и путь сотворите людем моим, и камение, еже на пути, размещите: воздвигните знамение на языки. ¹¹ Се бо, Господь слышано сотвори до последних земли: рцыте дщери сионове: се, спаситель твой грядет, имеяй с собою мзду и дело свое пред лицем своим. ¹² И прозовет я люди святы, избавлены Господем: ты же прозовешися взыскан град и не оставлен.