¹ Светися, светися Иерусалиме, прииде бо твой свет, и слава Господня на тебе возсия. ² Се, тма покрыет землю, и мрак на языки, на тебе же явится Господь, и слава его на тебе узрится. ³ И пойдут царие светом твоим, и языцы светлостию твоею. ⁴ Возведи окрест очи твои и виждь собраная чада твоя: се, приидоша вси сынове твои издалеча, и дщери твоя на рамех возмутся. ⁵ Тогда узриши и возрадуешися, и убоишися и ужаснешися сердцем, яко преложится к тебе богатство морское и языков и людий: ⁶ и приидут к тебе стада велблюд, и покрыют тя велблюди мадиамстии и гефарстии: вси от савы приидут, носяще злато, и ливан принесут и камень честен, и спасение Господне благовозвестят: ⁷ и вся овцы кидарския соберутся тебе, и овни навеофстии приидут к тебе, и вознесутся приятная на жертвенник мой, и дом молитвы моея прославится. ⁸ Кии суть, иже яко облацы летят, и яко голубие со птенцы ко мне? ⁹ Мене острови ждаша, и корабли фарсийстии во первых, привести чада твоя издалеча, и сребро и злато их с ними, имене ради Господня святаго, и за еже святому израилеву славну быти. ¹⁰ И созиждут сынове инороднии стены твоя, и царие их предстояти будут тебе: за гнев бо мой поразих тя и за милость мою возлюбих тя. ¹¹ И отверзутся врата твоя присно, день и нощь не затворятся, ввести к тебе силу язык и цари их ведомыя. ¹² Языцы бо и царие, иже не поработают ти, погибнут, и языцы запустением запустеют. ¹³ И слава ливанова к тебе приидет, кипарисом и певгом и кедром вкупе, прославити место святое мое, и место ногу моею прославлю. ¹⁴ И пойдут к тебе боящеся сынове смиривших тя и раздраживших тя, и поклонятся следам ногу твоею вси прогневавшии тя, и наречешися град Господень, сион святаго израилева. ¹⁵ За сие, яко был еси оставлен и возненавиден и не бе помагающаго ти, положу тя в радость вечную, веселие родом родов. ¹⁶ И изссеши млеко языков и богатство царей снеси, и уразумееши, яко аз Господь спасаяй тя и избавляяй тя Бог израилев. ¹⁷ И вместо меди принесу ти злато, и вместо железа принесу ти сребро, и вместо древес принесу ти медь, и вместо камения железо: и вдам князи твоя в мир и надзиратели твоя в правду. ¹⁸ И не услышится посем неправда в земли твоей, ни сокрушение ни бедность во пределех твоих, но прозовется спасение забрала твоя и врата твоя хвала. ¹⁹ И не будет тебе ктому солнце во свет дне, ниже восход луны просветит твою нощь, но будет тебе Господь свет вечный и Бог слава твоя. ²⁰ Не зайдет бо солнце тебе, и луна не оскудеет тебе: будет бо Господь тебе свет вечный, и исполнятся дние рыдания твоего. ²¹ И людие твои вси праведнии в век наследят землю, храняще сад дела руку его в славу. ²² Малый будет в тысящы, а малейший во язык велик: аз Господь по времени соберу их.