¹ Сия глаголет Господь: сохраните суд и сотворите правду, приближися бо спасение мое приити и милость моя открытися. ² Блажен муж творяй сия, и человек держайся их, и храняй субботы не оскверняти, и блюдый руце свои не творити неправды. ³ Да не глаголет иноплеменник приложивыйся ко Господеви: еда отлучит мя Господь от людий своих? и да не глаголет каженик, яко аз есмь древо сухо. ⁴ Сия глаголет Господь кажеником: елицы сохранят субботы моя и изберут яже аз хощу и содержат завет мой, ⁵ дам им в дому моем и во ограде моей место именито, лучшее от сынов и дщерей, имя вечно дам им, и не оскудеет: ⁶ и иноплеменником приложившымся Господеви работати ему и любити имя Господне, еже быти ему в рабы и рабыни, и вся снабдящыя субботы моя не оскверняти и держащыя завет мой, ⁷ введу я в гору святую мою и возвеселю я в дому молитвы моея: всесожжения их и жертвы их будут приятны на требнице моем: дом бо мой дом молитвы наречется всем языком, ⁸ глаголет Господь, собираяй разсеяныя израилевы, яко соберу к нему собор. ⁹ Вси зверие дивии, приидите, ядите, вси зверие дубравнии. ¹⁰ Видите, яко вси ослепоша, не разумеша смыслити, вси пси немии не возмогут лаяти, видяще сны на ложи, любяще дремати, ¹¹ и пси безстуднии душею, не ведяще сытости: и суть лукави, не ведяще смысла, вси путем своим последоваша, кийждо уклонишася в лихоимство свое, от перваго и до последняго. ¹² Приидите, да возмем вино и наполнимся пиянства, и будет яко днесь, тако и заутра, и много множае.