¹ Бысть же в то время, разболеся езекиа до смерти. И прииде к нему исаиа пророк сын амосов и рече к нему: сия глаголет Господь: устрой о доме твоем, умираеши бо ты и не будеши жив. ² И обрати езекиа лице свое ко стене и помолися ко Господеви глаголя: ³ помяни, Господи, како ходих пред тобою со истиною и сердцем истинным, и угодная пред тобою сотворих. и плакася езекиа плачем великим. ⁴ И бысть слово Господне ко исаии глаголя: ⁵ иди и рцы езекии: тако глаголет Господь Бог давида отца твоего: услышах молитву твою и видех слезы твоя, се, прилагаю к летом твоим лет пятьнадесять, ⁶ и от руки царя ассирийска избавлю тя и град сей, и защищу о граде сем: ⁷ сие же тебе знамение от Господа, яко Бог сотворит глаголгол сей, якоже глагола: ⁸ се, аз возвращу сень степеней, имиже сниде солнце десять степеней дому отца твоего, возвращу солнце десять степеней, имиже сниде сень. И взыде солнце десять степеней, имиже сниде сень. ⁹ Молитва езекии царя иудейска, егда боле и воста от недуга своего. ¹⁰ Аз рекох в высоте дний моих: пойду во врата адова, оставлю лета прочая. ¹¹ Рекох: ктому не узрю спасения Божия на земли живых, ктому не узрю спасения израилева на земли, ктому не узрю человека со живущими: ¹² остах от сродства моего, оставих прочее живота моего, изыде и отиде от мене аки разрушаяй кущу поткнувый: аки платно дух мой во мне бысть, ткателнице приближающейся отрезати. ¹³ В той день предан бых до заутра аки льву, тако сокруши вся кости моя: от дне бо до нощи предан бых. ¹⁴ Яко ластовица, тако возопию, и яко голубь, тако поучуся: изчезосте бо очи мои, еже взирати на высоту небесную ко Господу, иже избави мя и отя болезнь души моея: ¹⁵ и той сотвори путеводство во вся лета моя. ¹⁶ Господи, о той бо возвестися тебе, и воздвигл еси дыхание мое, и утешився ожих. ¹⁷ Избавил бо еси душу мою, да не погибнет, и завергл еси за мя вся грехи моя. ¹⁸ Не похвалят бо тебе, иже во аде, ни умершии возблагословят тя, и не надеются, иже во аде, милости твоея. ¹⁹ Живии же возблагословят тя, якоже и аз: отднесь бо дети сотворю, яже возвестят правду твою, ²⁰ Господи спасения моего: и не престану благословя тя с песнию вся дни живота моего прямо дому Божию. ²¹ И рече исаиа ко езекии: возми от смоквий и сотри, и приложи пластырь на язву и здрав будеши. ²² И рече езекиа: сие знамение, яко взыду в дом Божий.