¹ Горе чада отступившая, сия глаголет и Господь: сотвористе совет не мною и заветы не духом моим, приложити грехи ко грехом: ² идущии снити во египет, мене же не вопросиша, еже помощь имети от фараона и заступление от египтян. ³ Будет бо вам покров фараонов в постыдение и уповающым на египет укоризна: ⁴ яко суть в тане старейшины его, и вестницы его зли. ⁵ Вотще потрудятся людий ради, иже не упользуют их, ниже на помощь, ниже на пользу, но на студ и на укоризну. ⁶ В печали и в тесноте лев и львичищь: оттуду аспиды и племя аспидов парящих, иже везяху на ослех и на велблюдех богатство свое ко языку, иже не поможет им в помощь, но на студ и укоризну. ⁷ Египтяне вотще и всуе успеют вам: возвести им, яко тщетно утешение ваше сие. ⁸ Ныне убо сед напиши сия на дске и в книгу: яко будут сия во дни времен и даже до века. ⁹ Яко людие непокориви суть, сынове лживии, иже не похотеша слышати закона Божия, ¹⁰ глаголюще пророком: не поведайте нам: и видения видящым: не глаголите нам, но нам глаголите и возвещайте нам иное прельщение ¹¹ и совратите нас с пути сего: отимите от нас путь сей и отимите от нас суд израилев. ¹² Того ради сице глаголет Господь святый израилев: понеже не покористеся словесем сим и надеястеся на лжу, и яко пороптасте и уповающе бысте на слово сие, ¹³ сего ради будет вам грех сей, аки стена падающая внезапу града тверда пленена, егоже абие настоит падение: ¹⁴ и падение его будет яко сокрушение сосуда глиняна, от глины дробны, яко не можно обрести в них чрепа, имже огнь возмеши и в оньже влиеши воды мало. ¹⁵ Тако глаголет Господь, Господь святый израилев: егда возвратився воздохнеши, тогда спасешися и уразумееши, где еси был: егда уповал еси на суетная, тщетна крепость ваша бысть, и не хотесте послушати, ¹⁶ но рекосте: на конех побегнем. Того ради побегнете. И рекосте: на легких всадницы будем. Того ради легцы будут гонящии вас. ¹⁷ От гласа единаго побегнут тысяща, и от гласа пяти побегнут мнози, дондеже оставлени будете аки щогла на горе и яко знамя носяй на холме. ¹⁸ И паки пождет Бог, еже ущедрити вас, и сего ради вознесется еже помиловати вас: зане судия Господь Бог ваш есть, и где оставите славу вашу? блажени вси пребывающии в нем. ¹⁹ Зане людие святии в сионе вселятся, Иерусалим же плачем восплакася: помилуй мя. Помилует тя, егда узре глас вопля твоего, послуша тебе. ²⁰ И даст Господь вам хлеб печали и воду тесную, и ктому не приближатся к тебе льстящии тя: яко очи твои узрят прельщающих тя, ²¹ и ушеса твоя услышат словеса созади тебе прельщающих, иже глаголют: сей путь, поидим по нему или на десно, или на лево. ²² И отвержеши кумиры посребренныя, и позлащенныя раздробиши, и развееши яко воду жены месячныя, и аки мотыла отвержеши я. ²³ Тогда будет дождь семени земли твоея, и хлеб жита земли твоея будет изюбилен и тучен, и напасутся скоти твои в той день на месте тучне и пространне. ²⁴ Юнцы ваши и волове делающии землю наядятся плев смешенных со ячменем извеяным. ²⁵ И будет на всяцей горе высоце и на всяцем холме вознесенне вода текущая в день оный, егда погибнут мнози, и егда падутся столпи: ²⁶ и будет свет луны аки свет солнца, и свет солнечный будет седмерицею в той день, егда изцелит Господь сокрушение людий своих и болезнь язвы твоея изцелит. ²⁷ Се, имя Господне идет временем многим, горящая ярость его: со славою слово устен его, слово гнева полно, и гнев ярости яко огнь пояст: ²⁸ и дух его аки вода в дебри влекущи приидет даже до выи и разделится, еже смутити языки о прельщении суетнем, и поженет я прелесть тща, и возмет я пред лицем их. ²⁹ Еда присно подобает вам радоватися и входити во святая моя всегда, аки празднующым и яко веселящымся внити со сопелию в гору Господню к Богу израилеву? ³⁰ И слышану сотворит Господь славу гласа своего, и ярость мышцы своея показати, с яростию и гневом, и со пламенем поядающим возгремит зелно, и яко вода и град низходящь нуждею. ³¹ Гласом бо Господним побеждени будут ассириане язвою, еюже аще поразит я. ³² И будет ему окрест, отюнудуже бе их надежда помощи, на нюже той уповаше: тии со тимпаны и гусльми ратовати будут нань от пременения. ³³ Ты бо прежде дний истязан будеши: еда и тебе уготовася царствовати? дебрь глубокую, древеса лежаща, огнь и древа многа, ярость Господня аки дебрь жупелом горящая.