¹ Скоро идет и не умедлит: и помилует Господь иакова и изберет паки израиля, и почиют на земли своей, и пришлец приложится к ним и приложится к дому иаковлю, ² и поймут их языцы и введут на место их, и наследят и умножатся на земли Божии в рабы и рабыни: и будут пленени пленившии я, и обладани будут обладавшии ими. ³ И будет в той день, упокоит тя Господь от болезни и ярости твоея и от работы жестокия, еюже работал еси им. ⁴ И приимеши плачь сей на царя вавилонска и речеши в той день: како преста истязуяй и преста понуждаяй? ⁵ Сокруши Бог ярем грешников, ярем князей, ⁶ поразив язык яростию, язвою неизцельною, поражаяй язык язвою ярости, еюже не пощаде, почи уповающи. ⁷ Вся земля вопиет со веселием, ⁸ и древа ливанова возвеселишася о тебе и кедр ливанский: отнележе ты уснул еси, не взыде посекаяй нас. ⁹ Ад доле огорчися, срет тя: восташа с тобою вси исполини обладавшии землею, подвизавшии от престолов своих всех царей языческих. ¹⁰ Вси отвещают и рекут тебе: и ты пленен еси, якоже и мы: и в нас вменен еси. ¹¹ Сниде слава твоя во ад, многое веселие твое: под тобою постелют гнилость, и покров твой червь. ¹² Како спаде с небесе денница восходящая заутра? сокрушися на земли посылаяй ко всем языком. ¹³ Ты же рекл еси во уме твоем: на небо взыду, выше звезд иебесных поставлю престол мой, сяду на горе высоце, на горах высоких, яже к северу: ¹⁴ взыду выше облак, буду подобен вышнему. ¹⁵ Ныне же во ад снидеши и во основания земли. ¹⁶ Видевшии тя удивятся о тебе и рекут: сей человек раздражаяй землю, потрясаяй цари, ¹⁷ положивый вселенную всю пусту и грады ея разсыпа, плененых не разреши. ¹⁸ Вси царие языков успоша в чести, кийждо в дому своем. ¹⁹ Ты же повержен будеши в горах, яко мертвец мерзкий со многими мертвецы изсечеными мечем, сходящими во ад. ²⁰ Якоже риза в крови намочена не будет чиста, такожде и ты не будеши чист, зане землю мою погубил еси и люди моя избил еси: не пребудеши в вечное время, семя злое. ²¹ Уготови чада твоя на убиение грехами отца твоего, да не востанут и наследят землю и наполнят землю ратьми. ²² И востану на ня, глаголет Господь саваоф, и погублю имя их, и останок, и семя: сия глаголет Господь. ²³ И положу вавилона пуста, яко вогнездитися ежем, и будет ни во чтоже: и положу и брения пропасть в пагубу. ²⁴ Сия глаголет Господь саваоф: якоже глаголах, тако будет, и якоже совещах, тако пребудет, ²⁵ еже погубити ассириан на земли моей и на горах моих: и будут в попрание, и отимется от них ярем их, и слава их от рамен их отимется. ²⁶ Сей совет, егоже совеща Господь на всю вселенную, и сия рука на вся языки вселенныя: ²⁷ яже бо Бог святый совеща, кто разорит? и руку его высокую кто отвратит? ²⁸ В лето, в неже умре ахаз царь, бысть глагол сей: ²⁹ не радуйтеся, вси иноплеменницы, сокрушися бо ярем биющаго вы: от семене бо змиина изыдут изчадия аспидов, и изчадия их изыдут змии парящии: ³⁰ и упасутся убозии им, нищии же человецы в мире почиют: и потребит гладом семя твое, и останок твой избиет. ³¹ Восплачитеся, врата градов, да возопиют грады смятеннии, иноплеменницы вси, зане дым от севера идет, и несть, иже пребудет. ³² И что отвещают царие языков? яко Господь основа сиона, и тем спасутся смиреннии людий его.