¹ Видение на вавилона, еже виде исаиа сын амосов. ² На горе польней воздвигните знамение, вознесите глас им, не бойтеся, поущайте рукою, отверзите, князи. ³ Аз повелеваю, освященни суть: и аз веду их, исполини идут исполнити ярость мою радующеся, вкупе и укаряюще. ⁴ Глас языков многих на горах, подобен языков многих, глас царей и языков собравшихся: Господь саваоф заповеда языку оружеборцу ⁵ приити от земли издалеча, от края основания небесе, Господь и оружеборцы его, растлити всю вселенную. ⁶ Рыдайте: близ бо день Господень, и сокрушение от Бога приидет: ⁷ сего ради всяка рука разслабеет, и всяка душа человеча убоится, ⁸ и смятутся послы, и болезни приимут я яко жены раждающия: и поскорбят друг ко другу, и ужаснутся, и лице свое яко пламень изменят. ⁹ Се бо, день Господень грядет неизцельный, ярости и гнева, положити вселенную (всю) пусту и грешники погубити от нея. ¹⁰ Звезды бо небесныя и орион и все украшение небесное света своего не дадят, и помрачится солнце возсиявающее, и луна не даст света своего. ¹¹ И заповем всей вселенней злая и нечестивым грехи их, и погублю укоризну беззаконных и укоризну гордых смирю: ¹² и будут оставшии честнии паче, нежели злато нежженое, и человек честен будет паче, нежели камень, иже от суфира. ¹³ Разярится бо небо, и земля потрясется от оснований своих, за ярость гнева Господа саваофа в день, в оньже приидет ярость его. ¹⁴ И будут оставшии яко серна бежащая и яко овца заблудившая, и не будет собираяй, яко человеку в люди своя возвратитися, и человек во страну свою побегнет. ¹⁵ Иже бо аще пленится, поразится, и иже собрани суть, мечем падут. ¹⁶ И чада их пред ними разбиют, и домы их пленят, и жены их поймут. ¹⁷ Се, аз возбуждаю на вы мидов, иже сребра не вменяют, ниже злата требуют: ¹⁸ стреляния юношеская сокрушат, и чад ваших не помилуют, ниже пощадят чад твоих очи их. ¹⁹ И будет вавилон, иже нарицается славный от царя халдейска, якоже разсыпа Бог содому и гоморру, ²⁰ не населится в вечное время, и не внидут в онь чрез многия роды, ниже пройдут его аравляне, ниже пастуси почиют в нем. ²¹ И почиют тамо зверие, и наполнятся домове шума, и почиют ту сирини, и беси тамо воспляшут, ²² и онокентавры тамо вселятся, и вогнездятся ежеве в домех их.