¹ Воспою ныне возлюбленному песнь возлюбленнаго моего винограду моему: виноград бысть возлюбленному в розе, на месте тучне: ² и ограждением оградих и окопах, и насадих лозу избранну, и создах столп посреде его, и предточилие ископах в нем, и ждах, да сотворит гроздие, и сотвори терние. ³ И ныне, живущии во Иерусалиме и человече иудин, судите между мною и виноградом моим. ⁴ Что сотворю еще винограду моему, и не сотворих ему? занеже ждах, да сотворит гроздие, сотвори же терние. ⁵ Ныне убо возвещу вам, что аз сотворю винограду моему: отиму ограждение его, и будет в разграбление: и разорю стену его, и будет в попрание. ⁶ И оставлю виноград мой, и ктому не обрежется, ниже покопается, и взыдет на нем, якоже на лядине, терние: и облаком заповем, еже не одождити на него дождя. ⁷ Виноград бо Господа саваофа, дом израилев есть, и человек иудин новый сад возлюбленный: ждах, да сотворит суд, сотвори же беззаконие, и не правду, но вопль. ⁸ Горе совокупляющым дом к дому и село к селу приближающым, да ближнему отимут что: еда вселитеся едини на земли? ⁹ Услышашася бо во ушесех Господа саваофа сия: аще бо будут домове мнози, в запустение будут велицыи и добрии, и не будут живущии в них: ¹⁰ идеже бо возорют десять супруг волов, сотворит корчаг един, и сеяй артавас шесть сотворит меры три. ¹¹ Горе востающым заутра и сикер гонящым, ждущым вечера: вино бо сожжет я: ¹² со гусльми бо и певницами, и тимпаны и свирельми вино пиют, на дела же Господня не взирают и дел руку его не помышляют. ¹³ ~бо пленени быша людие мои, за еже не ведети им Господа, и множество бысть мертвых глада ради и жажди водныя. ¹⁴ И разшири ад душу свою и разверзе уста своя, еже не престати: и снидут славнии и велицыи и богатии и губителие их и веселяйся в нем: ¹⁵ и смирится человек, и обезчестится муж, и очи высокоглядающии смирятся. ¹⁶ И вознесется Господь саваоф в суде, и Бог святый прославится в правде: ¹⁷ и упасутся расхищеннии яко юнцы, и пустыни плененных агнцы поядят. ¹⁸ Горе привлачающым грехи яко ужем долгим, и яко ига юнична ременем беззакония своя, ¹⁹ глаголющым: скоро да приближатся, яже сотворит, да видим, и да приидет совет святаго израилева, да разумеем. ²⁰ Горе глаголющым лукавое доброе, и доброе лукавое, полагающым тму свет, и свет тму, полагающым горькое сладкое, и сладкое горькое. ²¹ Горе, иже мудри в себе самих и пред собою разумни. ²² Горе крепким вашым, вино пиющым, и вельможам растворяющым сикер, ²³ оправдающым нечестива даров ради, и еже есть праведное праведнаго вземлющым от него. ²⁴ Сего ради якоже сгорит трость от углия огненнаго и сожжется от пламене разгоревшагося, корень их яко персть будет, и цвет их яко прах взыдет: не восхотеша бо закона Господа саваофа, но слово святаго израилева раздражиша. ²⁵ И возярися гневом Господь саваоф на люди своя, и наложи руку свою на них, и порази их: и раздражишася горы, и быша трупи их яко гной посреде пути. И во всех сих не отвратися ярость его, но еще рука его высока. ²⁶ Воздвигнет убо знамение во языцех сущих далече и позвиждет им от конец земли, и се, скоро легце грядут: ²⁷ не взалчут, ни утрудятся, ни воздремлют, ни поспят, ни распояшут поясов своих от чресл своих, ниже расторгнутся ремени сапогов их: ²⁸ ихже стрелы остры суть, и луцы их напряжени: копыта коней их яко тверд камень вменишася, колеса колесниц их яко буря. ²⁹ Ярятся яко львове, и предсташа яко львичища: и имет, и возопиет яко зверь, и извержет, и не будет отемлющаго их. ³⁰ И возопиет их ради в той день, яко шум моря волнующася: и воззрят на землю, и се, тма жестока в недоумении их.