¹ Слово бывшее от Господа ко исаии сыну амосову о иудеи и о Иерусалиме. ² Яко будет в последния дни явлена гора Господня, и дом Божий на версе гор, и возвысится превыше холмов: и приидут к ней вси языцы. ³ И пойдут языцы мнози и рекут: приидите, и взыдем на гору Господню и в дом Бога иаковля, и возвестит нам путь свой, и пойдем по нему. От сиона бо изыдет закон, и слово Господне из Иерусалима: ⁴ и судити будет посреде язык и изобличит люди многи: и раскуют мечы своя на орала и копия своя на серпы, и не возмет язык на язык меча, и не навыкнут ктому ратоватися. ⁵ И ныне, доме иаковль, приидите, пойдем светом Господним. ⁶ Остави бо люди своя, дом иаковль: зане якоже из начала наполнися страна их волхвований, якоже иноплеменников, и чада многа иноплеменнича родишася им. ⁷ Наполнися бо страна их сребра и злата, и не бяше числа сокровищ их: и наполнися земля их коней, и не бяше числа колесниц их: ⁸ и наполнися земля мерзостей дел рук их, и поклонишася тем, яже сотвориша персты их: ⁹ и преклонися человек и смирися муж, и не претерплю им. ¹⁰ И ныне внидите в камение и скрыйтеся в землю от лица страха Господня и от славы крепости его, егда востанет сокрушити землю. ¹¹ Очи бо Господни высоцы, человек же смирен: и смирится высота человеческая, и возиесется Господь един в день оный. ¹² День бо Господа саваофа на всякаго досадителя и горделиваго, и на всякаго высокаго и величаваго, и смирятся: ¹³ и на всяк кедр ливанский высоких и превознесенных и на всяко древо желудя васанска, ¹⁴ и на всякую гору высокую и на всякий холм высокий, ¹⁵ и на всякий столп высок и на всякую стену высокую, ¹⁶ и на всякий корабль морский и на всяко видение доброты кораблей. ¹⁷ И смирится всякий человек, и падется высота человеча, и вознесется Господь един в день оный. ¹⁸ И рукотвореная вся скрыют, ¹⁹ внесше в пещеры и в разселины камений и в вертепы земныя, от лица страха Господня и от славы крепости его, егда востанет сокрушити землю. ²⁰ В день бо оный изринет человек мерзости своя златыя и сребряныя, яже сотвориша, да покланяются суетным и нетопырем, ²¹ еже внити в вертепы твердаго камене и в разселины камений, от лица страха Господня и от славы крепости его, егда востанет сокрушити землю. ²² Оставите (убо) вам человека, емуже есть дыхание в ноздрех его: яко в чем вменися сей?