¹ Симон сын ониин иерей великий, иже в животе своем сострои дом и во дни своя утверди церковь. ² И тем основана бысть высота сугуба, воздвижение высоко ограждения церковнаго. ³ Во дни его умалишася сосуди воднии, ров яко моря окружение. ⁴ Блюдый люди своя от падения и укрепивый град во обседении. ⁵ Коль прославлен бысть в сожителстве людий, во исходе дому катапетасмы? ⁶ яко звезда утренняя посреде облаков, аки луна полна во днех своих, ⁷ яко солнце сияющее на церковь вышняго, и аки дуга светящаяся на облацех славы: ⁸ яко цвет шипков во днех весенных, яко крин при исходищих воды, яко стебло ливаново во днех жатвы: ⁹ яко огнь и ливан на огнищи, ¹⁰ якоже сосуд злат искован, украшен всяким камением многоценным, ¹¹ яко маслина износящая плоды и яко кипарис возрастаяй до облак. ¹² Внегда взимати ему одежду славы и облачатися ему в совершение хваления, в восхождении олтаря святаго прослави одежду святыни. ¹³ Внегда же приимати части от рук иерейских, и той стояше при огнищи олтаря: ¹⁴ окрест его венец братии, яко прозябение кедрско в ливане, и окружиша его яко стеблие финиково: ¹⁵ и вси сынове аарони во славе своей, и приношение Господне в руках их пред всем собором израилевым. ¹⁶ И совершение служителей на олтарех, еже украсити приношение вышняго вседержителя, ¹⁷ простре на чашу возлияния руку свою, изгнете от крове гроздныя, возлия на основание олтаря в воню благоухания вышнему всех Цареви. ¹⁸ Тогда возопиша сынове аарони, трубами коваными вострубиша, услышан сотвориша глас велик на память пред вышним. ¹⁹ Тогда вси людие обще приспеша и падоша ницы на земли поклонитися Господеви своему вседержителю Богу вышнему: ²⁰ и восхвалиша певцы гласы своими, в велицем гласе усладися пение: ²¹ и помолишася людие Господу вышнему молитвою пред милостивым, дондеже совершися красота Господня, и службу свою скончаша. ²² Тогда сошед воздвиже руки своя на весь собор сынов израилевых, дати благословение Господеви от устен своих и именем его похвалитися. ²³ И повтори поклонение прияти благословение от вышняго. ²⁴ И ныне благословение Бога всех, велия творящаго единаго всюду, возносящаго дни нашя от ложесн и творящаго с нами по милости своей: ²⁵ да даст нам веселие сердца, и да будет мир во дни нашя во израили якоже дни века: ²⁶ да уверит с нами милость свою и во дни своя избавит ны. ²⁷ Два языка омерзеста души моей, а третий несть язык: ²⁸ седящии на горе самарийстей и филистимляне, и людие буи живущии в сикимех. ²⁹ Наказание разума и ведения начерта в книзе сей иисус сын сирахов, Иерусалимлянин, иже одожди премудрость от сердца своего. ³⁰ Блажен, иже в сих поживет, и иже я положит в сердцы своем, упремудрится. ³¹ Аще бо сотворит сия, ко всем укрепится, яко свет Господень след его.