¹ И по сем воста нафан пророчествовати во дни давидовы. ² Якоже тук отлучен от жертвы мирныя, тако давид от сынов израилевых. ³ Со львы играше яко с козлищи и с медведми яко со агнцы овчими. ⁴ Во юности своей не убил ли исполина, и отят поношение от людий, ⁵ егда простре руку с каменем из пращи низложити гордыню голиафову? ⁶ Призва бо Господа вышняго, и вдаде в десницу его крепость низложити человека сильна на брани, вознести рог людий своих. ⁷ Сице во тмах прослави его и восхвали его во благословениих Господних, внегда носити ему венец славы. ⁸ Потреби бо враги окрест и уничижи филистимляны противники: даже доднесь сокруши им рог. ⁹ Во всяцем деле своем даде исповедание святому вышнему глаголом славы: ¹⁰ всем сердцем своим восхвали и возлюби сотворшаго и. ¹¹ И постави певцы прямо олтареви, и звуком их услаждати пение. ¹² Даде во праздницех благолепие и украси времена даже до скончания, внегда воспевати им имя святое его и от утра гласити во святилищи. ¹³ Господь отя грехи его и вознесе во век рог его, и даде ему завет царский и престол славы во израили. ¹⁴ По сем воста сын разумичен и сего ради обита в пространстве: ¹⁵ соломон воцарися во днех мира, яко Бог препокои окрест, да созиждет дом во имя его и да уготовит святилище во век. ¹⁶ Коль преумудрился еси во юности своей и наполнился еси яко река разума. ¹⁷ Землю покры душа твоя, и исполнил еси притчами гаданий: ¹⁸ пройде имя твое во островы далече, и возлюблен был еси в мире твоем. ¹⁹ В песнех и паримиах и во притчах и во сказаниих удивишася тебе страны. ²⁰ Именем Господа Бога, нареченнаго Бога израилева, ²¹ собрал еси яко медь злато и яко олово умножил еси сребро. ²² Вдал еси бока твоя женам и поработился еси телом твоим: ²³ дал еси порок славе твоей и осквернил еси семя твое, нанести гнев на чада твоя, и умилитися о безумии твоем: еже разделитися на двое царству, и от ефрема начатися царству непокориву. ²⁴ Господь же не оставит милости своея и не растлит от дел своих, ниже истребит избраннаго своего изчадий и семя возлюбившаго его не измет. ²⁵ И иакову даде останок, и давиду от него корень. ²⁶ И почи соломон со отцы своими ²⁷ и остави по себе от семене своего людем безумие, ²⁸ и умаляющася разумом ровоама, иже отстави люди от совета своего, ²⁹ и иеровоама сына наватова, иже сотвори согрешити израилю и даде ефрему путь ко греху. ³⁰ И умножишася греси их зело, отступити им от земли своея: ³¹ и всяко лукавство изыскаша, дондеже месть прииде на ня.