¹ о смерте, коль горька твоя есть память человеку мирно во имениих своих живущу, ² мужеви не пекущуся и благополучну во всех, и еще возмогающу прияти пищу. ³ о, смерте, добр суд твой есть человеку требующему и умаляющуся крепостию, ⁴ в последней старости сущему и пекущуся о всех, и неверствующу и погубившу терпение. ⁵ Не бойся суда смерти: помяни первая твоя и последняя, сей бо суд от Господа всяцей плоти. ⁶ И почто отмещешися благоволения вышняго? аще десять, аще сто, аще тысяща лет, ⁷ несть во аде обличения живота. ⁸ Чада бывают мерзка чада грешников, и живущая в селениих нечестивых: ⁹ чад грешных погибнет наследие, и с семенем их выну поношение. ¹⁰ Отца нечестива укорят чада, яко его ради поношение приимут. ¹¹ Горе вам, мужие нечестивии, иже остависте закон Бога вышняго: ¹² и аще родитеся, на клятву родитеся: и аще умрете, в клятву разделени будете. ¹³ Вся, елика от земли, в землю пойдут: такожде нечестивии от клятвы в пагубу. ¹⁴ Сетование человеков в телесех их: имя же грешников неблагое потребится. ¹⁵ Пецыся о имени, то бо ти пребывает паче тысящ великих сокровищ злата. ¹⁶ Благаго жития число дний, и доброе имя во веки пребывает. ¹⁷ Наказание в мире соблюдите, чада: премудрость же сокровенна и сокровище неявленно, кая польза во обоих? ¹⁸ Лучше человек скрываяй буйство свое, нежели человек скрываяй премудрость свою. ¹⁹ Темже убо усрамитеся словес моих: ²⁰ несть бо благо всяк срам сохраняти, и не вся всем в вере благоволятся. ²¹ Стыдитеся пред отцем и материю о блуде и пред сильным и властелином о лжи, ²² пред судиею и князем о согрешении, пред собором и людьми о беззаконии, ²³ пред общником и другом о неправде, и на месте, идеже живеши, о татьбе, ²⁴ и пред истиною Божиею и заветом, и от опертия лактей на трапезе, от прельщения взятия и даяния, ²⁵ и от целующих о молчании, от видения жены блудницы и от отвращения сроднича лица, ²⁶ от отятия части и даяния и от присмотрения жены мужаты и от обольщения рабыни своея, ²⁷ и не приступи ко одру ея: ²⁸ пред други о словесех поносных, и по даянии не поноси: ²⁹ от повторения и слова слышания и от откровения словес тайных: и будеши стыдлив истинно и обретаяй благодать пред всяким человеком.