¹ Почитай врача противу потреб честию его, ибо Господь созда его: ² от вышняго бо есть изцеление, и от царя приимет дар. ³ Художество врача вознесет главу его, и пред вельможами удивимь будет. ⁴ Господь созда от земли врачевания, и муж мудрый не возгнушается ими. ⁵ Не от древа ли осладися вода, да познана будет сила его? ⁶ И той дал есть художество человеком, да славится в чудесех своих: ⁷ теми уврачева и отят болезни их. ⁸ Мироварец сими состроит смешение, и не скончаются дела его, и мир от него есть на лицы земли. ⁹ Чадо, в болезни твоей не презирай, но молися Господеви, и той тя изцелит: ¹⁰ отступи от прегрешения и направи руце, и от всякаго греха очисти сердце (твое): ¹¹ даждь благоухание и память семидала и умасти приношение, акибы не первее приносяй: ¹² и даждь место врачу, Господь бо его созда: и да не удалится от тебе, потребен бо ти есть. ¹³ Есть время, егда в руку его благоухание: ¹⁴ ибо и тии Господеви молятся, да управит им покой и изцеление ради оздравления. ¹⁵ Согрешаяй пред сотворшим его впадет в руце врачу. ¹⁶ Чадо, над мертвецем источи слезы и якоже зле страждущь начни плачь: и якоже достоит ему, соскутай тело его и не презри погребения его. ¹⁷ Горек сотвори плачь и рыдание тепло, и сотвори сетование, якоже ему достоит, день един и два хуления ради, и утешися печали ради: ¹⁸ от печали бо смерть бывает, и печаль сердечная слячет крепость. ¹⁹ В нанесении пребывает и печаль, и житие нищаго в сердцы. ²⁰ Не даждь в печаль сердца твоего, остави ю помянув последняя. ²¹ Не забуди, несть бо возвращения: и ему пользы не сотвориши, и себе озлобиши. ²² Помяни суд его, яко сице и твой: мне вчера, а тебе днесь. ²³ В покои мертвеца упокой память его, и утешися о нем во исходе духа его. ²⁴ Премудрость книжника во благовремении празднества, и умаляяйся деянием своим упремудрится. ²⁵ Чим умудрится держай орало и хваляйся остном, гоняй волы и обращаяйся в делех их, и повесть его в сынех юнчих? ²⁶ Сердце свое даст возрыти бразды, и бдение его на насыщениих юниц. ²⁷ Тако всяк древоделя и архитектон, иже нощи яко дни провождает, делая изваяния печатей, и прилежание его изменити различие: ²⁸ сердце свое даст уподобити живописание, и бдение его еже совершити дело. ²⁹ Такожде и ковачь седя близ наковални и соглядаяй дело железа: курение огня удручит тело его, и теплотою пещи утрудится: ³⁰ глас млата обновит ухо его, и прямо подобию сосуда очи его: ³¹ сердце свое вдаст на скончание дел, и бдение его украсити до конца. ³² Такожде и скудельник седя на деле своем и вертя ногама своима коло, ³³ иже в печали лежит выну на деле своем, изчисляемо все делание его: ³⁴ мышцею своею вообразит брение и пред ногама преклонит крепость его: ³⁵ сердце свое вдаст скончати сосуд, и бдение его очистити пещь. ³⁶ Вси сии на руки своя надеются, и кийждо в деле своем умудряется. ³⁷ Без тех не населится град, и не вселятся, ни походят и в соборище не возмутся: ³⁸ на престоле же судий не сядут и завета суду не размыслят, ниже имут извещати наказания и суда, и в притчах не обрящутся: ³⁹ но токмо зданием житейским прилежат, и моление их в делании художества.