¹ Боящагося Господа не срящет зло: аще и в напасть впадет, паки измет его. ² Муж премудр не возненавидит закона, сумняйжеся в нем якоже в бури корабль. ³ Человек разумив веру имет закону, и закон ему верен, ⁴ яко вопрошение праведных. Приготови слово, и тако услышан будеши: сочетай наказание и тогда отвещай. ⁵ Коло колесничное утроба буяго, и якоже ось вертящаяся помышление его. ⁶ Конь на яждении яко друг лицемерен, под всяким яздящим ржет. ⁷ Почто день дне преспевает, и всяк свет дне лета от солнца? ⁸ Разумом Господним разлучистася, и измени время и праздники: ⁹ от них вознесе и освяти, и от них положи в число дний. ¹⁰ И человецы вси от персти, и от земли создан бысть адам. ¹¹ Множеством ведения Господь раздели я и измени пути их. ¹² От них благослови и вознесе, и от них освяти и к себе приближи, от них прокля и смири и соврати их от стояния их. ¹³ Яко брение скудельника в руце его, вси путие его по изволению его: тако человецы в руце сотворшаго их, имже воздаст по суду своему. ¹⁴ (Яко) противу злому благое и противу смерти живот, тако противу благочестиваго грешник. И сице воззри во вся дела вышняго: двое двое, едино противу единому. ¹⁵ Аз же последний бдех и наследих якоже от начатка, якоже собираяй вслед оымателей виноградных. ¹⁶ Во благословение Господне достигох и яко оыматель наполних точило. ¹⁷ Разсмотрите, яко не себе единому трудихся, но всем ищущым наказания. ¹⁸ Послушайте мене, вельможи людий, и властелие собора, внушите. ¹⁹ Сыну и жене, брату и другу не даждь власти на себе в животе своем, ²⁰ и не даждь иному имения своего, да не раскаешися требуяй их: ²¹ дондеже жив еси и дыхание в тебе, не измени себе всяцей плоти: ²² лучше бо есть, да тебе молятся чада твоя, нежели тебе зрети в руце чад твоих. ²³ Во всех делех твоих буди преспевая и не даждь порока на славу твою. ²⁴ В день скончания дний живота твоего и во время смерти твоея раздели наследие твое. ²⁵ Пища и жезлие и бремя ослу: хлеб и наказание и дело рабу. ²⁶ Накажи раба, и обрящеши покой: ослаби руку ему, и искати начнет свободы. ²⁷ Иго и ремень выю прекланяют, и рабу лукаву узы и раны. ²⁸ Вложи его в дело, да не празден будет, мнозей бо злобе научила праздность: ²⁹ устрой его в делех, якоже подобает ему, и аще не послушает, всади его во оковы. ³⁰ И не буди излишен над всякою плотию, и без суда не сотвори ничесоже. ³¹ Аще ти есть раб, да будет якоже ты, понеже кровию стяжал еси его: ³² аще ти есть раб, имей его якоже брата, понеже яко души твоея востребуеши его: ³³ аще озлобиши его неправедно, и востав отбежит, киим путем поищеши его? (не веси.)