¹ Любяй сына своего участит ему раны, да возвеселится в последняя своя. ² Наказуяй сына своего насладится о нем и посреде знаемых о нем похвалится. ³ Учай сына своего раздражит врага и пред други о нем возрадуется. ⁴ Умре отец его, и аки не умре: подобна бо себе остави по себе. ⁵ Во житии своем виде и возвеселися о нем и при кончине своей не оскорбися: ⁶ противу врагом остави местника и другом воздающа благодать. ⁷ Угождаяй сыну обяжет струпы его, и о всяцем вопли возмятется утроба его. ⁸ Конь неукрощен свиреп бывает, и сын самовольный продерз будет. ⁹ Ласкай чадо, и устрашит тя, играй с ним, и опечалит тя. ¹⁰ Не смейся с ним, да не поболиши о нем и на последок стиснеши зубы твоя. ¹¹ Не даждь ему власти в юности и не презри неведения его: ¹² сляцы выю его в юности и сокруши ребра его, дондеже млад есть, да не когда ожестев не покориттися. ¹³ Накажи сына твоего и делай им, да не в безстудии его поткнешися. ¹⁴ Лучше нищь здрав и крепок в силе своей, нежели богат уранен телом своим. ¹⁵ Здравие и крепость лучше есть всякаго злата, и тело здравое, нежели богатство безчисленное. ¹⁶ Несть богатство лучше здравия телеснаго, и несть веселие паче радости сердечныя. ¹⁷ Лучше есть смерть паче живота горька или недуга долгаго. ¹⁸ Благая излиянная пред усты затворенными предложения брашен предлежащая у гроба. ¹⁹ Кая польза идолу от жертвы? не имать бо ясти, ни обоняти: ²⁰ тако гонимый от Господа, ²¹ зряй очима и стеняй, якоже евнух осязаяй девицу и воздыхаяй. ²² Не вдаждь в печаль душу твою и не оскорби себе советом твоим. ²³ Веселие сердца живот человека, и радование мужа долгоденствие. ²⁴ Люби душу твою и утешай сердце твое, и печаль от себе отрини далече: ²⁵ многи бо печаль уби, и несть пользы в ней. ²⁶ Рвение и ярость умаляют дни, и печаль прежде времене старость наводит. ²⁷ Светло сердце и благо о брашне и о яди своей попечется.