¹ За скудость мнози согрешиша, и ищай обогатети отвратит око. ² Посреде собраных камений вонзется кол, и посреде продаяния и купли совершится грех. ³ Аще не держится страха Господня со тщанием, вскоре превратится дом его. ⁴ Трясением решета останет сметие: такожде отреби человечестии в помышлении его. ⁵ Сосуды скудельничи искушает пещь, и искушение человеческо в помышлении его. ⁶ Возделание древа являет плод его: тако слово помышления в сердцы человечестем. ⁷ Прежде беседы не похвали мужа: сия бо искушение (есть) человеков. ⁸ Аще гониши правду, постигнеши ю и облечешися в ню яко в подир славы. ⁹ Птицы с подобными себе обитают, и истина к творящым ю обратится. ¹⁰ Лев ловит лов, такожде и греси делающих неправду. ¹¹ Повесть благочестиваго всегда премудрость: безумный же яко луна изменяется. ¹² Посреде безумных блюди время, посреде же размышляющих учащай. ¹³ Повесть буих мерзость, и смех их во услаждении греха. ¹⁴ Беседа многокленущагося подимет власы, и свар его затчение ушес. ¹⁵ Пролитие крове свар гордых, и укоризна их слух тяжкий. ¹⁶ Открываяй тайная погубляет верность и не обрящет друга противу души своея. ¹⁷ Возлюби друга и уверися с ним: ¹⁸ аще же открыеши тайны его, не имаши гнати по нем. ¹⁹ Якоже бо погубит человек врага своего, тако погубиши дружбу искренняго: ²⁰ и якоже птицу из руки твоея испустиши, тако испустил еси искренняго и не уловиши его: ²¹ не гонися за ним, яко далече отступи и избеже яко серна от сети. ²² Яко струп есть обязати, и клеветы есть измена: ²³ открывый же тайная погуби верность. ²⁴ Помизаяй оком кует зло, и никтоже его отставит от того: ²⁵ пред очима твоима усладит уста своя и словесем твоим подивится, ²⁶ последи же развратит уста своя и в словесех твоих даст соблазн. ²⁷ Многая возненавидех и не обретох подобна ему, и Господь возненавидит его. ²⁸ Вергаяй камень на высоту на главу свою вергает, и язва льстива раздерет струпы. ²⁹ Ископоваяй ров впадется в онь, и распростираяй сеть увязнет в ней. ³⁰ Творяй зло ввалится в не и не познает, откуду приидет ему. ³¹ Поругание и поношение гордых, и отмщение яко лев уловит их. ³² Сетию уловятся веселящиися о падении благоверных, и болезнь изнурит я прежде смерти их. ³³ Гнев и ярость, и сия суть мерзость, и муж грешник одержан ими будет.