1 Премудрость похвалит душу свою и посреде людий своих восхвалится. 2 В Церкви вышняго отверзет уста своя и прямо силе его восхвалится: 3 аз из уст вышняго изыдох и яко мгла покрых землю, 4 аз на высоких вселихся, и престол мой во столпе облачне, 5 круг небесный обыдох едина и во глубине бездны походих, 6 волну морскую и всю землю, и вся люди и язык стяжах, 7 со всеми сими покоя взысках, и во наследии чием водворюся? 8 Тогда заповеда ми создатель всех, и создавый мя препокои скинию мою и рече: 9 во иакове вселися и во израили наследствуй. 10 Прежде века из начала созда мя, и даже до века не оскудею. 11 Во скинии святей пред ним послужих и тако в сионе утвердихся: 12 во граде возлюбленнем такожде мя препокои, и во Иерусалиме власть моя: 13 и укоренихся в людех прославленных, в части Господни наследия его. 14 Яко кедр вознесохся в ливане и яко кипарис на горах аермонских, 15 яко финикс возвысихся на брезех и яко сад шипковый во иерихоне, 16 яко маслина благолепна на поли, и вознесохся яко явор: 17 якоже корица и яко аспалаф ароматов дах воню, и яко смирна избранна издах благоухание, 18 яко халвани и оникс и стакти, и яко ливаново курение во скинии. 19 Аз яко теревинф распрострох ветвия моя, и ветви моя ветви славы и благодати: 20 аз яко виноград прорастих благодать, и цвети мои плод славы и богатства. 21 Приступите ко мне, желающии мене, и от плодов моих насытитеся: 22 память бо моя сладка паче меда, и наследие мое паче сота медвена. 23 Ядущии мя еще взалчут, и пиющии мя еще вжаждутся: 24 слушаяй мене не посрамится и делающии у мене не согрешат. 25 Сия вся книга завета Бога вышняго, 26 закон, егоже заповеда моисей, наследие сонмом иаковлим: 27 насыщая яко фисон премудростию и яко тигр во дни новоплодий, 28 исполняяй яко евфрат разума и якоже иордан во днех жатвы, 29 являяй яко свет наказание и якоже гион во дни оымания вина. 30 Не сконча первый уразумети ея, такожде и последний не изследи ея: 31 ибо паче моря умножися размышление ея, и совет ея паче бездны велия. 32 И аз яко раскопание из реки и якоже водотечие изыдох в рай. 33 Рех: напою мой вертоград и упою себе луг: 34 и се, раскопание ми бысть рекою, и река моя бысть морем. 35 Понеже наказание яко утро просвещу и проявлю е даже до далече: 36 еще учение якоже пророчество излию и оставлю е в роды вечны. 37 Видите, яко не себе единому трудихся, но всем ищущым ея.