1 Делатель пиянивый не будет богат, и уничижаяй малая по мале упадет. 2 Вино и жены превратят разумивых, и прилагаяйся любодейцам дерзший будет: 3 молие и червие наследят его, и душа дерзостная измется. 4 Емляй скоро веру легок сердцем, и согрешаяй на душу свою согрешает. 5 Веселяйся сердцем о злонравии обличен будет, противляяйся же похотем венчает живот свой. 6 Обуздаваяй язык тихомирно поживет, и ненавидяй велеречия умалит порок. 7 Словесе никогдаже повтори, и ничтоже тебе умалится. 8 На друга и на врага не поведай, и аще не будет тебе греха, не открывай: 9 слыша бо у тебе, и соблюдет тя, и во время возненавидит тя. 10 Слышал ли еси слово, да умрет с тобою: не убойся, не расторгнет тебе. 11 От лица словесе поболит буй, якоже раждающая от лица младенца. 12 Стрела вонзена в стегно плоти, тако слово во чреве буяго. 13 Обличи друга, егда еще не сотворил, и аще сотворил, да не приложит ктому: 14 обличи друга, негли не рече, и аще рече единожды, да не повторит: 15 обличи друга, многажды бо бывает навет. 16 Не всякому словеси емли веры. 17 Есть поползаяйся словом, а не душею: и кто не согреши языком своим? 18 Обличи искренняго своего прежде прещения, и даждь место закону вышняго. Всяка премудрость страх Господень, и во всяцей премудрости творение закона. 19 И несть премудрость ведение лукавства, и несть разума, идеже совет грешных. 20 Есть лукавство, и то мерзость, и есть безумен умаляяйся премудростию. 21 Лучше есть умаляяйся в разуме боязливый, нежели избыточествуяй мудростию и преступая закон. 22 Есть коварство испытно, и то неправедно, и есть развращаяй благодать извещати хотя суд. 23 Есть лукавствуяй поник чернотою, и внутренняя его исполнь льсти: 24 понича лицем и притворяяйся глух, идеже не познан бысть, предварит тя. 25 И аще немощию крепости возбранен будет согрешити, аще обрящет время, зло сотворит. 26 От зрака познан будет муж, и сретением лица познан будет умный. 27 Одеяние мужа и смех зубов и стопы человека возвестят, яже о нем. 28 Есть обличение, еже несть красно, и есть молчай, и той мудр.