¹ Живый во веки созда вся обще. Господь един оправдится: ² никтоже доволен исповести дел его, ³ и кто изследит величия его? ⁴ Державу величества его кто изочтет? и кто приложит исповедати милости его? ⁵ Не леть умалити, ниже приложити, и не леть изследити чудес Господних. ⁶ Егда скончает человек, тогда начинает, и егда престанет, тогда усумнится. ⁷ Что есть человек? и что потреба его? что благо его? и что зло его? ⁸ Число дний человеку много лет сто: яко капля морския воды и зерно песка, тако мало лет в день века. ⁹ Сего ради долготерпе Господь на них и излия на ня милость свою. ¹⁰ Виде и позна низвращение их, яко зло, ¹¹ сего ради умножи милосердие свое. ¹² Милость человеча на искренняго своего, милость же Господня на всяку плоть. ¹³ Обличаяй и наказуяй, и научаяй и обращаяй яко пастырь стадо свое: ¹⁴ приемлющих наказание милует и тщащихся о судбах его. ¹⁵ Чадо, во благих не даждь порока, и во всяцем даянии печали словес. ¹⁶ Не устудит ли зноя роса? тако лучше слово, нежели даяние. ¹⁷ Не се ли, слово паче даяния блага? обоя же у мужа благодатна. ¹⁸ Буй неблагодарно поносит, и даяние завидливаго истаевает очи. ¹⁹ Прежде неже возглаголеши, увеждь, и прежде недуга врачуйся: ²⁰ прежде суда испытай себе и в час посещения обрящеши очищение: ²¹ прежде даже в недуг не впадеши, смирися, и во время грехов покажи обращение. ²² Не воспятися воздати обет благовременно и не ожидай даже до смерти оправдатися: ²³ прежде даже не помолишися, уготови себе, и не буди яко человек искушая Господа. ²⁴ Помяни гнев в день скончания и время мести во отвращении лица: ²⁵ помяни время глада во время сытости, нищету и убожество в день богатства. ²⁶ От утра до вечера изменяется время, и вся скора суть пред Господем. ²⁷ Человек премудр во всем опасен будет и во днех грехов вонмет о согрешении. ²⁸ Всяк разумив позна премудрость, и обретшему ю даст исповедание. ²⁹ Разумнии в словесех, и тии умудришася и умножиша притчи испытны. воздержание души. ³⁰ Вслед похотей твоих не ходи и от похотений своих возбраняйся: ³¹ аще даси души твоей благоволение желания, сотворит тя обрадование врагом твоим. ³² Не веселися о мнозей сладости и не связуйся союбщением ея. ³³ Не буди нищь пиршествуяй от взаимства, и ничто ти будет в мешце.