¹ Премудрость смиреннаго вознесет главу его и посреде вельмож посадит его. ² Не похвали человека во красоте его, и не буди ти мерзок человек видением своим. ³ Мала есть в пернатых пчела, и начаток сладостей плод ея. ⁴ Во одеянии риз не похвалися и в день славы не превозносися: яко дивна дела Господня и тайна дела его пред человеки. ⁵ Мнози мучителие седоша на земли, нечаемый же увязеся венцем. ⁶ Мнози сильнии укорени быша зело, и славнии предани быша в руки инех. ⁷ Первее неже испытаеши, не порицай, уразумей прежде и тогда запрещай. ⁸ Прежде неже услышиши, не отвещавай, и не влагайся в среду беседы. ⁹ О вещи, яже ти несть на потребу, не тяжися, и на суде грешников не седай. ¹⁰ Чадо, деяния твоя да не будут о мнозе: аще умножиши, не будеши неповинен, и аще се гониши, не постигнеши, и не утечеши бежащь. ¹¹ Есть труждаяйся и потяся и тщася, и толико паче лишается. ¹² Есть слаб и требуяй заступления, лишаяйся силы, и нищетою изюбилует: ¹³ и очи Господни призреста ему во благая, и воздвиже и от смирения его, и вознесе главу его, и дивишася о нем мнози. ¹⁴ Благая и злая, живот и смерть, нищета и богатство от Господа суть. ¹⁵ Даяние Господне пребывает благочестивым, и благоволение его благопоспешится во век. ¹⁶ Есть богатяйся удержанием и скупостию своею, и сия часть мзды его, ¹⁷ внегда рещи ему: обретох покой и ныне ям от благ моих. ¹⁸ И не весть, кое время приидет, и оставит я инем, и умрет. ¹⁹ Стой в завете твоем и пребывай в нем, и в деле твоем обетшай. ²⁰ Не дивися делом грешника, веруй же Господеви и пребывай в труде твоем: ²¹ яко удобно есть пред очима Господнима внезапу обогатити нищаго. ²² Благословение Господне на мзде благочестиваго, и в час скор процветет благословение его. ²³ Не рцы: кая ми потреба есть, и кая отныне будут ми благая? ²⁴ Не рцы: доволна ми суть, и чим отселе озлоблен буду? ²⁵ В день благих забвение злых, в день же злых не воспомянутся благая: ²⁶ яко удобно есть пред Богом, в день смерти воздати человеку по делом его. ²⁷ Озлобление времене забытие творит сладости, и в скончании человека открытие дел его. ²⁸ Прежде смерти не блажи ни когоже, и в чадех своих познан будет муж. ²⁹ Не всякаго человека вводи в дом твой: многи бо суть козни льстиваго. ³⁰ Якоже рябка уловленая в клетце (обглядает), тако сердце гордаго, и якоже соглядник назирает падения: ³¹ доброе бо на зло обращая, подсаду творит и на добрыя детели возложит порок. ³² От искры огненныя умножается углие, и человек грешник на кровь приседит. ³³ Блюдися от злодея, зло бо содевает, да не когда порок даст ти во век. ³⁴ Всели чуждаго в дом твой, и развратит тя мятежем и чужда тя сотворит от твоих ти.