¹ Не твори зла, и не постигнет тя зло: ² отступи от неправды, и уклонится от тебе. ³ Сыне, не сей на браздах неправды и не имаши пожати их седмерицею. ⁴ Не проси у Господа владычества, ниже от царя седалища славы. ⁵ Не оправдай себе пред Богом и пред царем не мудрися. ⁶ Не ищи, да будеши судия, егда не возможеши отяти неправды: да не когда убоишися лица сильнаго и положиши соблазн в правости твоей. ⁷ Не согрешай во множестве града и не низлагай себе в народе. ⁸ Не свяжи дважды греха, и во единем бо не неповинен будеши. ⁹ Не рцы: на множество даров моих воззрит, и приносящу ми Богу вышнему, приимет. ¹⁰ Не малодушествуй в молитве твоей и милостыню творити не презри. ¹¹ Не ругайся человеку сущу в горести души его: есть бо смиряяй и возносяй. ¹² Не ори лжи на брата твоего, ниже другу тожде твори. ¹³ Не восхощи лгати всякия лжи: учащение бо ея не на благо. ¹⁴ Не буди велеречив во множестве старец и не повтори слова в молитве твоей. ¹⁵ Не возненавиди труднаго дела и земледелия от вышняго создана. ¹⁶ Не привменяй себе ко множеству грешников. ¹⁷ Смири душу твою зело. ¹⁸ Помяни, яко гнев не замедлит, ¹⁹ понеже месть нечестиваго огнь и червь. ²⁰ Не измени друга ни на что, ни брата присна на злате софирстем. ²¹ Не отступай от жены премудры и благи, ибо благодать ея паче злата. ²² Не озлоби раба делающа во истине, ниже наемника вдающа душу свою. ²³ Раба разумива да любит душа твоя, и не лиши его свободы. ²⁴ Есть ли ти скот, призирай его, и аще ти будет потребен, да пребудет ти. ²⁵ Суть ли ти чада, накажи я и преклони от юности выю их. ²⁶ Суть ли ти дщери, внимай телу их и не являй веселаго к ним лица твоего. ²⁷ Выдай дщерь, и будеши совершивый дело велико: и мужеви разумиву даждь ю. ²⁸ Есть ли ти жена по души, не изжени ея. ²⁹ Всем сердцем твоим прославляй отца твоего и матерних болезней не забуди: ³⁰ помяни, яко тема рожден еси, и что има воздаси, якоже она тебе? ³¹ Всею душею твоею благоговей Господеви и иереи его чти. ³² Всею силою (твоею) возлюби сотворшаго тя и служителей его не остави. ³³ Бойся Господа и прослави иереа, и даждь часть ему, якоже заповедано ти: ³⁴ начатки, и о согрешении, и даяние мышцей, и жертву святыни, и начаток святых. ³⁵ И нищему простри руку твою, да совершится благословение твое. ³⁶ Благодать даяния пред всяким живым (да будет), и над мертвецем не возбрани благодати. ³⁷ Не устраняйся от плачущих и с сетующими сетуй. ³⁸ Не ленися посещати боляща: сими бо возлюблен будеши. ³⁹ Во всех словесех твоих поминай последняя твоя, и во веки не согрешиши.